തിരുവല്ല : സുഹൃത്തുക്കള്‍ക്കൊപ്പം കുളിക്കാനിറങ്ങിയ തിരുവല്ല സ്വദേശിയടക്കം രണ്ട് ഐ.ടി പ്രൊഫഷണലുകള്‍ ഈ റോഡിലെ അണക്കെട്ടില്‍ മുങ്ങിമരിച്ചു. തിരുവല്ല കാവുംഭാഗം പുറയാറ്റ് വീട്ടില്‍ സുരേഷ് ബാബു-അനിത കുമാരി ദമ്പതികളുടെ ഏക മകന്‍ കിരണ്‍ ബാബു (23), മലപ്പുറം പൊന്നാനി ഐരമംഗലം തട്ടകത്ത് വീട്ടില്‍ പ്രകാശ് – പ്രിയ ദമ്പതികളുടെ മകന്‍ യദുകൃഷ്ണന്‍ (22) എന്നിവരാണ് മരിച്ചത്.
മരിച്ച ഇരുവരും ബാംഗ്ലൂരിലെ ഐ.ടി കമ്പിനിയില്‍ ജീവനക്കാരായിരുന്നു. ശനിയാഴ്ച വൈകിട്ട് മൂന്ന് മണിയോടെ കാവേരി നദിയിലെ കാരണ പാളയം അണക്കെട്ടിലായിരുന്നു അപകടം. കിരണ്‍ ഉള്‍പ്പെടുന്ന ഏഴംഗ സംഘം വിനായക ചതുര്‍ത്ഥിയോട് അനുബന്ധിച്ച്‌ ഈറോഡ് ചെന്നിമല സ്വദേശിയും സുഹൃത്തുമായ നരേന്ദ്രന്റെ വീട്ടില്‍ എത്തിയതായിരുന്നു.
സുഹൃത്തിന്റെ വീട്ടില്‍ നിന്നും രണ്ട് കാറുകളിലായാണ് സംഘം കുളിക്കാനെത്തിയത്. കുളിക്കുന്നതിനിടെ കിരണും യദുവും വെള്ളത്തില്‍ മുങ്ങിത്താഴുകയായിരുന്നു. സുഹൃത്തുക്കള്‍ ഒച്ച വെച്ചതിനെ തുടര്‍ന്ന് സമീപത്തുണ്ടായിരുന്ന മീന്‍പിടുത്തക്കാര്‍ ഓടിയെത്തി ഇരുവരെയും കരയ്ക്ക് എത്തിച്ചെങ്കിലും മരിച്ചിരുന്നു. പോസ്റ്റുമോര്‍ട്ടം നടപടികള്‍ക്കായി മൃതദേഹങ്ങള്‍ പെരുംന്തുറ മെഡിക്കല്‍ കോളേജിലേക്ക് മാറ്റി.
