മലയാളത്തിൽ മാത്രമല്ല, തമിഴിലും തെലുങ്കിലും നസ്രിയയ്ക്ക് നിരവധി ആരാധകരുണ്ട്. താരം പങ്കുവയ്ക്കുന്ന പോസ്റ്റുകളൊക്കെ നിമിഷ നേരം കൊണ്ടാണ് ആരാധക ശ്രദ്ധ പിടിച്ചുപറ്റുന്നത്. ഇപ്പോഴിത നസ്രിയ പങ്കുവച്ചിരിക്കുന്ന പുതിയ ചിത്രമാണ് ആരാധക മനം കവരുന്നത്. എ ആർ റഹ്മാനൊപ്പമുള്ള ചിത്രമാണ് നസ്രിയ ഷെയർ ചെയ്തിരിക്കുന്നത്. നസ്രിയ്ക്കൊപ്പം ഫഹദ് ഫാസിലുമുണ്ട് ചിത്രത്തിൽ. ഇതിഹാസത്തിനൊപ്പം എന്നാണ് നസ്രിയ ചിത്രത്തിന് ക്യാപ്ഷൻ നൽകിയിരിക്കുന്നത്. ട്വിറ്ററിലാണ് താരം ചിത്രം പോസ്റ്റ് ചെയ്തിരിക്കുന്നത്.
ഫഹദ് ഫാസിൽ അഭിനയിച്ച മലയൻകുഞ്ഞ് എന്ന ചിത്രത്തിന് സംഗീതമൊരുക്കിയത് എ ആർ റഹ്മാനായിരുന്നു. ധൂമം ആണ് ഫഹദിന്റേതായി ഏറ്റവുമൊടുവിൽ തീയേറ്ററുകളിലെത്തിയ ചിത്രം. കന്നഡ സിനിമ രംഗത്തെ പ്രശസ്ത ബാനറായ ഹോംബാലെ ഫിലിംസാണ് ചിത്രം നിർമ്മിച്ചിരിക്കുന്നത്. കന്നഡ സംവിധായകൻ പവൻ കുമാറിന്റെ മലയാളത്തിലേക്കുള്ള അരങ്ങേറ്റം കൂടിയായിരുന്നു ഈ ചിത്രം. മലയാളത്തിന് പുറമേ നാല് ഭാഷകളിൽ ചിത്രമെത്തിയിരുന്നു. അതേസമയം മാരി സെൽവരാജ് സംവിധാനം ചെയ്യുന്ന തമിഴ് ചിത്രം മാമന്നൻ ആണ് ഫഹദിന്റേതായി റിലീസിനൊരുങ്ങുന്ന ചിത്രം.
ഈ മാസം ഒടുവിൽ ചിത്രം തീയേറ്ററുകളിലെത്തും. വടിവേലു, ഉദയനിധി സ്റ്റാലിൻ എന്നിവരും ചിത്രത്തിൽ പ്രധാന വേഷത്തിലെത്തുന്നുണ്ട്. അല്ലു അർജുൻ നായകനായെത്തുന്ന പുഷ്പ 2 ഉം ഫഹദിന്റേതായി ആരാധകർ കാത്തിരിക്കുന്ന ചിത്രങ്ങളിലൊന്നാണ്. അതേസമയം നാനിയ്ക്കൊപ്പമെത്തി അന്റെ സുന്ദരനിക്കിയാണ് നസ്രിയയുടേതായി ഒടുവിലെത്തിയ ചിത്രം. നസ്രിയയ്ക്കും ഫഹദിനും തമിഴിലും നിരവധി ആരാധകരുണ്ട്. സൂപ്പർ ഡീലക്സ്, വിക്രം, പുഷ്പ എന്നീ ചിത്രങ്ങളാണ് ഫഹദിനെ തെന്നിന്ത്യൻ പ്രേക്ഷകരുടെ പ്രിയങ്കരനാക്കി മാറ്റിയത്.
