പത്തനംതിട്ട : പത്തനംതിട്ട പാർലമെന്റ് മണ്ഡലത്തിൽ നടപ്പിലാക്കാൻ ഉദ്ദേശിക്കുന്ന വികസനക്ഷേമ പദ്ധതികളുമായി എൻ ഡി എയുടെ പ്രത്യേക പ്രകടന പത്രിക വികസിത ഭാരതം പത്തനംതിട്ട എഡിഷൻ എന്ന പേരിൽ പത്തനംതിട്ടയിൽ കേന്ദ്രമന്ത്രി മീനാക്ഷി ലേഖി പ്രകാശനം ചെയ്തു. വനിതാക്ഷേമം, പ്രവാസി ക്ഷേമം പൈതൃക സംരക്ഷണം, ആത്മീയ ടൂറിസം, ആരോഗ്യം, വിദ്യാഭ്യാസം, റെയിൽവേ തുടങ്ങിയ മേഖലകളെ സമഗ്രമായി സ്പർശിച്ചും ശബരിമല മേഖലയുടെ സമ്പൂർണ വികസനത്തിനായി ശാസ്‌താനിവേദ്യം, പമ്പാനദിയുടെ പുണ്യം വീണ്ടെടുക്കാൻ ‘നമാമി പമ്പ’ തുടങ്ങിയ പദ്ധതികളും പ്രകടന പത്രികയിൽ ഉണ്ട്.
സഹകരണ മേഖല ശാക്തീകരണത്തിനും ഉന്നത വിദ്യഭ്യാസ വികസനത്തിനും വയോ സംരക്ഷണത്തിനും ആദിവാസി സമൂഹത്തിന്റെ ക്ഷേമത്തിനും ആരാധനാലയങ്ങളുടെ സുരക്ഷയ്ക്കും റോഡ്‌ വികസനത്തിനും കർഷകക്ഷേമത്തിനും വന്യജീവി ആക്രമണത്തിൽ നിന്നുള്ള സംരക്ഷണത്തിനും ഉൾപ്പെടെ വിശദമായ വികസന ക്ഷേമ പദ്ധതികളാണ് പ്രകടന പത്രികയിൽ ഉൾക്കൊള്ളിച്ചിരിക്കുന്നത്. പത്തനംതിട്ട പ്രസ്സ് ക്ലബ്ബിൽ നടന്ന പ്രകാശന ചടങ്ങിൽ കേന്ദ്രമന്ത്രി മീനാക്ഷി ലേഖിയ്ക്കൊപ്പം എൻ ഡി എ സ്ഥാനാർഥി അനിൽ കെ ആന്റണി, ബിജെപി സംസ്ഥാന ജനറൽ സെക്രട്ടറി ജോർജ് കുര്യൻ ബിജെപി സംസ്ഥാന സെക്രട്ടറിയും ലോക്സഭ ഇൻചാർജ്മായ കരമന ജയൻ, ബിജെപി ജില്ല പ്രസിഡന്റ് അഡ്വ വി എ സൂരജ്,ജില്ല വൈസ് പ്രസിഡന്റ് വിജയകുമാർ മണിപ്പുഴ എന്നിവർ ഒപ്പമുണ്ടായിരുന്നു
