തിരുവനന്തപുരം: ജൂണ്‍ ഒന്നുമുതല്‍ കാലവര്‍ഷത്തിന് തുടക്കമാകുന്ന സാഹചര്യത്തില്‍ ദേശീയ ദുരന്ത പ്രതികരണ സേനയുടെ (എന്‍.ഡി.ആര്‍.എഫ്) നാല് സംഘം അടുത്ത ദിവസങ്ങളില്‍ കേരളത്തിലെത്തുമെന്ന് മുഖ്യമന്ത്രി പിണറായി വിജയന്‍ അറിയിച്ചു. കാലവര്‍ഷമെത്തുന്ന സാഹചര്യത്തില്‍ ദേശീയ ദുരന്ത പ്രതികരണ സേനയെ മുന്‍കൂട്ടി വിന്യസിക്കണമെന്ന് സംസ്ഥാനം ആവശ്യപ്പെട്ടിരുന്നു. എന്‍.ഡി.ആര്‍.എഫിന്റെ ഒരു സംഘത്തില്‍ 48 പേരാണുണ്ടാവുക. വയനാട്, ഇടുക്കി, തൃശ്ശൂര്‍, ആലപ്പുഴ എന്നീ ജില്ലകളിലാണ് ആദ്യ സംഘം എത്തുക. എന്‍.ഡി.ആര്‍.എഫിന്റെ ഒരു സംഘം നിലവില്‍ തൃശൂരിലുണ്ട്.
