ന്യൂഡല്ഹി : നീറ്റ് പരീക്ഷയുമായി ബന്ധപ്പെട്ട് വലിയ അഴിമതി നടക്കുന്നുണ്ടെന്ന് സി.ബി.ഐ. പരീക്ഷക്ക് ആള്മാറാട്ടം നടത്തുന്നതിനായി വിദ്യാര്ഥികളില് നിന്ന് 50 ലക്ഷം രൂപ വാങ്ങിയെന്ന് സി.ബി.ഐ കണ്ടെത്തിയതായി റിപ്പോര്ട്ടുകള്. സര്ക്കാര് മെഡിക്കല് കോളജുകളില് അഡ്മിഷന് നല്കാമെന്ന് വാഗ്ദാനം ചെയ്ത് വിദ്യാര്ഥികളില് നിന്ന് കോഴ വാങ്ങുന്നയെന്നതാണ് ആരോപണം.
മഹാരാഷ്ട്ര കേന്ദ്രമാക്കി പ്രവര്ത്തിക്കുന്ന ആര്.കെ എഡ്യുക്കേഷന് കരിയര് ഗൈഡന്സ് സെന്ററും ഡയറക്ടര് പരിമള് കോത്പാലിവാറും കേസില് പ്രതിയാണെന്നാണ് സൂചന. നീറ്റ് പരീക്ഷയില് ക്രമക്കേട് നടത്തി അഡ്മിഷന് വാങ്ങി നല്കാമെന്നായിരുന്നു കരിയര് ഗൈഡന്സ് ഡയറക്ടര് പരിമളിന്റെ വാഗ്ദാനം. വിദ്യാര്ഥികളില് നിന്ന് 50 ലക്ഷത്തിന്റെ ചെക്കും എസ്.എസ്.എല്.സി, പ്ലസ് ടു സര്ട്ടിഫിക്കറ്റുകളും നേരത്തെ തന്നെ സ്ഥാപനം വാങ്ങിയിരുന്നു.
ആള്മാറാട്ടം നടത്തുന്നതിന് സൗകര്യപ്രദമായ രീതിയില് വിദ്യാര്ഥികളുടെ ഫോട്ടോയില് ഉള്പ്പടെ മാറ്റം വരുത്തി. പിന്നീട് പരീക്ഷഹാളില് വിദ്യാര്ഥികള്ക്കായി മറ്റൊരാളാണ് പരീക്ഷക്കെത്തുക. ഇത്തരത്തില് എത്തുന്നയാള്ക്ക് വ്യാജ ആധാര് കാര്ഡും നല്കും. അഞ്ച് വിദ്യാര്ഥികള്ക്കായി ആര്.കെ എഡ്യുക്കേഷന് ഇത്തരത്തില് ആള്മാറാട്ടം നടത്താന് ആളുകളെ തയാറാക്കിയിരുന്നുവെന്നാണ് റിപ്പോര്ട്ട്. എന്നാല്, അന്വേഷണ ഏജന്സികള് നിരീക്ഷണം ശക്തമാക്കിയതോടെ തട്ടിപ്പില് നിന്നും പിന്മാറിയെന്നുമാണ് സി.ബി.ഐ വ്യക്തമാക്കുന്നത്. കേസുമായി ബന്ധപ്പെട്ട് നിരവധി സ്ഥലങ്ങളില് റെയ്ഡ് നടത്തിയ സി.ബി.ഐ അറസ്റ്റുകള് നടത്തിയെന്നും റിപ്പോര്ട്ടുണ്ട്.
