കാഠ്മണ്ഡു: ഇന്ത്യക്കാര്‍ക്കുള്ള പൗരത്വ നിയമത്തില്‍ നേപ്പാള്‍ മാറ്റം വരുത്തി. പുതിയ ഭേദഗതിയനുസരിച്ച് നേപ്പാളി പൗരന്മാര്‍ വിവാഹം കഴിക്കുന്ന ഇന്ത്യന്‍ പെണ്‍കുട്ടികള്‍ക്ക് പൗരത്വം ലഭിക്കുവാന്‍ ഏറ്റവും കുറഞ്ഞത് ഏഴു വര്‍ഷമെങ്കിലും കാത്തിരിക്കണം.
ഇന്ത്യന്‍ പൗരന്മാരെ വിവാഹം ചെയ്യുന്ന വിദേശികള്‍ക്ക് ഏഴു വര്‍ഷത്തിനു ശേഷമാണ് ഇന്ത്യ പൗരത്വം നല്‍കുന്നത്. ഇക്കാര്യം ചൂണ്ടിക്കാട്ടിയാണ് നേപ്പാള്‍ ആഭ്യന്തര മന്ത്രി രാം ബഹദൂര്‍ ഥാപ്പ ഭേദഗതിയെ ന്യായീകരിച്ചത്. എന്നാല്‍ ഇന്ത്യയുടെ പൗരത്വനിയമത്തിന്റെ ഈ ഉപാധി നേപ്പാള്‍ പൗരന്മാര്‍ക്ക് ബാധകമല്ലെന്ന കാര്യം പ്രസ്താവനയില്‍ അദ്ദേഹം പരാമര്‍ശിച്ചിട്ടില്ല. ഇന്ത്യയും നേപ്പാളും തമ്മിലുള്ള ബന്ധം വഷളായതിനു പിന്നാലെയാണ് പൗരത്വ നിയമത്തില്‍ നേപ്പാള്‍ ഭേദഗതി വരുത്തിയത്.
