ലണ്ടന്: മാഗി ഉള്പ്പടെ തങ്ങളുടെ ഭൂരിപക്ഷം ഭക്ഷ്യ ഉല്പ്പന്നങ്ങളും അനാരോഗ്യകരമാണെന്ന് നെസ്ലെയുടെ അഭ്യന്തര റിപ്പോര്ട്ട്. അനാരോഗ്യകരമായ പ്രവണതകള് മറികടക്കാനായുള്ള നടപടികളിലാണ് കമ്പിനിയെന്നും മാധ്യമങ്ങള് റിപ്പോര്ട്ട് ചെയ്യുന്നു.
ബ്രിട്ടീഷ് മാധ്യമമായ ഫിനാന്ഷ്യല് ടൈംസിന്റെ റിപ്പോര്ട്ട് പ്രകാരം കമ്പിനിയുടെ ഉയര്ന്ന തസ്തികകളിലുള്ള എക്സിക്യൂട്ടീവുകള്ക്ക് അയച്ച റിപ്പോര്ട്ടിലാണ് ഇക്കാര്യം പറയുന്നത്. ചോക്ളേറ്റുകള് അടക്കമുള്ള 60 ശതമാനം നെസ്ലെ ഉല്പ്പന്നങ്ങളും ആരോഗ്യസ്ഥിതിക്ക് ഗുണകരമാകുന്നതല്ല എന്നാണ് റിപ്പോര്ട്ടിലെ പ്രധാന ഉള്ളടക്കം. ബേബി ഫുഡ്, വളര്ത്തുമൃഗങ്ങള്ക്കുള്ള ഭക്ഷണം, കോഫി, മെഡിക്കല് ഉല്പ്പന്നങ്ങള് എന്നിവ സംബന്ധിച്ച റിപ്പോര്ട്ട് ഇതില് ഉള്പ്പെടുത്തിയിട്ടില്ല.
ചില തരം ഉല്പ്പന്നങ്ങള് എത്രതന്നെ ആരോഗ്യകരമാക്കാന് ശ്രമിച്ചാലും സാധിക്കില്ലെന്നും നെസ്ലെ പറയുന്നു. കമ്പിനിയുടെ 37 ശതമാനം ഉല്പ്പന്നങ്ങള് ആസ്ട്രേലിയയിലെ ഫുഡ് റേറ്റിങ്ങില് 5ല് 3.5 സ്റ്റാറില് അധികം നേടിയിട്ടുണ്ട്. എന്നാല് വെള്ളവുമായും പാലുമായും ബന്ധപ്പെട്ട ഉല്പ്പന്നങ്ങള് മികച്ച ഗുണനിലവാരം പുലര്ത്തുന്നതായി റിപ്പോര്ട്ടില് പറയുന്നു. വെള്ളവുമായി ബന്ധപ്പെട്ട 82 ശതമാനം ഉല്പ്പന്നങ്ങളും പാലുമായി ബന്ധപ്പെട്ട 60 ശതമാനം ഉല്പ്പന്നങ്ങളും 3.5 സ്റ്റാറില് അധികം നേടിയിട്ടുണ്ട്. ഉല്പന്നങ്ങളുടെ ഗുണനിലവാരം ഉയര്ത്താന് പ്രത്യേക പദ്ധതികള് ആവിഷ്കരിക്കുമെന്നും നെസ്ലെ പറയുന്നു.
