കട്ടപ്പന: നവജാതശിശുവിനെ കൊലപ്പെടുത്തിയ കട്ടപ്പനയിലെ വനിത ഹോസ്റ്റലില്‍ ഫോറന്‍സിക് സംഘം തെളിവെടുത്തു. അവിവാഹിതയായ ബാങ്ക് ഉദ്യോഗസ്ഥ കട്ടപ്പനയിലെ വനിത ഹോസ്റ്റലില്‍ പ്രസവിച്ച ശിശു മരിച്ച സംഭവം കൊലപാതകമാണെന്ന് പോലീസ് സ്ഥിരീകരിച്ചതിനെത്തുടര്‍ന്നാണ് ഇടുക്കിയില്‍നിന്ന് ഫോറന്‍സിക് വിദഗ്ധര്‍ ഹോസ്റ്റലില്‍ എത്തി തെളിവെടുത്തത്.
ശ്വാസംമുട്ടി കുഞ്ഞ് മരിച്ചെന്നാണ് പോസ്റ്റുമോര്‍ട്ടം റിപ്പോര്‍ട്ട്. ഇതിന്റെ അടിസ്ഥാനത്തില്‍ കൊലപാതകം നടന്ന മുറി, ബെഡ്, തറയിലെയും ബെഡിലെയും രക്തക്കറ, തലയണ എന്നിവ പരിശോധിച്ചു.
കുഞ്ഞിന്റെ തലയില്‍ പരിക്ക്‌ എങ്ങനെ ഉണ്ടായെന്നും ശ്വാസംമുട്ടിച്ച്‌ കൊലപ്പെടുത്തിയത് എവിടെ വെച്ചെന്നതടക്കവും കണ്ടെത്താനാണ് ശ്രമം. കോട്ടയം മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുന്ന യുവതിയെ ഡിസ്ചാര്‍ജ് ചെയ്താല്‍ ഉടന്‍ അറസ്റ്റ് ചെയ്ത് മൊഴി രേഖപ്പെടുത്തുമെന്ന് കട്ടപ്പന പോലീസ് ഇന്‍സ്പെക്ടര്‍ വിശാല്‍ ജോണ്‍സന്‍ പറഞ്ഞു.
പോലീസ് നിരീക്ഷണത്തിലുള്ള യുവതി ആരോഗ്യനില വീണ്ടെടുത്തുവരുന്നതേയുള്ളൂ. കട്ടപ്പനയിലെ സ്വകാര്യ ബാങ്കിലെ ജീവനക്കാരിയായ യുവതി ബാങ്കുമായി ബന്ധപ്പെട്ട യുവാവുമായി അടുപ്പത്തിലായിരുന്നെന്ന് സൂചന ലഭിച്ചിട്ടുണ്ട്. ഗര്‍ഭാവസ്ഥ മറച്ചുവെച്ചായിരുന്നു ജോലിയ്ക്ക് പോയിരുന്നത്. കഴിഞ്ഞ വെള്ളിയാഴ്ചയാണ് സ്വകാര്യ ഹോസ്റ്റലില്‍ ആണ്‍കുഞ്ഞിന് ജന്മം നല്‍കിയത്.
കട്ടപ്പന ഡിവൈ.എസ്.പി രാജ്‌മോഹനന്‍, വിശാല്‍ ജോണ്‍സന്‍, എസ്.ഐ സന്തോഷ് സജീവ് എന്നിവരുടെ നേതൃത്വത്തിലാണ് അന്വേഷണം.
