പത്തനംതിട്ട : അഴിമതിയും കെടുകാര്യസ്ഥതയും നിറഞ്ഞ പിണറായി സര്ക്കാരിന്റെ ജനദ്രോഹ ഭരണത്തിനെതിരെ ജനങ്ങളുടെ താക്കീതായി പ്രതിപക്ഷ നേതാവ് വി.ഡി. സതീശന് നയിക്കുന്ന പുതുയുഗ യാത്ര മാറുമെന്ന് യു.ഡി.എഫ് സംസ്ഥാന കണ്വീനര് അഡ്വ. അടൂര് പ്രകാശ് എം.പി പറഞ്ഞു. പുതുയുഗ യാത്രയുടെ മുന്നൊരുക്കങ്ങള്ക്കായി പത്തനംതിട്ട രാജീവ് ഭവന് ഓഡിറ്റോറിയത്തില് സംഘടിപ്പിച്ച യു.ഡി.എഫ് ജില്ലാ പ്രവര്ത്തകയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ശബരിമലയിലെ സ്വര്ണക്കൊള്ള, കരിവന്നൂര് ബാങ്ക് കൊള്ള ഉള്പ്പെടെ പിണറായി ഭരണത്തില് തീവെട്ടിക്കൊള്ളകളുടെ പരമ്പരയാണ് അരങ്ങേറിയതെന്നും ഇതുമൂലം സി.പി.എം പാര്ട്ടിയും നേതാക്കളും തടിച്ചു കൊഴുത്തിരിക്കുകയാണെന്നും യു.ഡി.എഫ് കണ്വീനര് പറഞ്ഞു.
യു.ഡി.എഫ് ജില്ലാ ചെയര്മാന് അഡ്വ. വര്ഗീസ് മാമ്മന് അദ്ധ്യക്ഷത വഹിച്ചു. ആന്റോ ആന്റണി എം.പി മുഖ്യപ്രഭാഷണം നടത്തി. ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പില്, കെ.പി.സി.സി രാഷ്ട്രീയകാര്യ സമിതി അംഗം പന്തളം സുധാകരന്, യു.ഡി.എഫ് ജില്ലാ കണ്വീനര് എ. ഷംസുദ്ദീന്, കെ.പി.സി.സി ജനറല് സെക്രട്ടറിമാരായ പി. മോഹന്രാജ്, പഴകുളം മധു, ജില്ലാ പഞ്ചായത്ത് പ്രസിഡന്റ് ദീനാമ്മ റോയി, വൈസ് പ്രസിഡന്റ് അനീഷ് വരിക്കണ്ണാമല, കെ.ഇ. അബ്ദുള് റഹ്മാന്, സമദ് മേപ്രത്ത്, ടി.എം. ഹമീദ്, മാലേത്ത് സരളാദേവി, ജോസഫ് എം. പുതുശ്ശേരി, കുഞ്ഞുകോശി പോള്, അഡ്വ. പ്രസന്നകുമാര്, സനോജ് മേമന, ഹന്സല മുഹമ്മദ്, ജോണ് സാമുവല്, സണ്ണി ചെറുകര, ലാലു തോമസ്, ജോണ്സണ് വിളവിനാല്, സാമുവല് കിഴക്കുപുറം, എ. സുരേഷ് കുമാര്, റോജിപോള് ദാനിയേല് എന്നിവര് പ്രസംഗിച്ചു.
