തിരുവനന്തപുരം : സര്ക്കാര് ഒന്നാം വര്ഷം പൂര്ത്തിയാക്കുന്നതിനോടനുബന്ധിച്ച് 100 ദിന കര്മ്മ പരിപാടികള് സംസ്ഥാനത്ത് നടപ്പാക്കുന്നു. ഇതിന്റെ ഭാഗമായി പുതിയതും നവീകരിച്ചതുമായ 25 സപ്ലൈകോ വില്പനശാലകളുടെ പ്രവര്ത്തനം ആരംഭിക്കുന്നതിന്റെ സംസ്ഥാന തല ഉദ്ഘാടനവും തിരുവനന്തപുരം തമ്പാനൂര് കെ.എസ്.ആര്.ടി.സി ബസ് ടെര്മിനലില് ആരംഭിക്കുന്ന സപ്ലൈകോ സൂപ്പര് മാര്ക്കറ്റിന്റെ ഉദ്ഘാടനവും ഫെബ്രു. 26 വൈകീട്ട് 5.30ന് മുഖ്യമന്ത്രി പിണറായി വിജയന് നിര്വഹിക്കും. ഭക്ഷ്യ-പൊതുവിതരണ വകുപ്പു മന്ത്രി അഡ്വ.ജി.ആര്.അനില് അധ്യക്ഷത വഹിക്കും. ഗതാഗത മന്ത്രി അഡ്വ.ആന്റണിരാജു ആദ്യ വില്പന നടത്തും. പൊതുവിദ്യാഭ്യാസ വകുപ്പു മന്ത്രി വി.ശിവന്കുട്ടി മുഖ്യാതിഥിയാകും.
ഡോ. ശശി തരൂര് എം.പി, മേയര് എസ്. ആര്യാ രാജേന്ദ്രന് എന്നിവര് വിശിഷ്ടാതിഥികളാകും. ഡെ. മേയര് പി.കെ.രാജു, കെ.എസ്.ആര്.ടി.സി ചെയര്മാന് ഡോ.ബിജു പ്രഭാകര്, കൗണ്സിലര് സി.ഹരികുമാര്, രാഷ്ട്രീയ പാര്ട്ടി പ്രതിനിധികള് തുടങ്ങിയവര് പങ്കെടുക്കും. സപ്ലൈകോ മാനേജിങ് ഡയറക്ടര് ഡോ. സഞ്ജീബ് കുമാര് പട്ജോഷി സ്വാഗതവും ജനറല് മാനേജര് ടി.പി.സലീം കുമാര് നന്ദിയും പറയും. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളിലെ വിവിധ സപ്ലൈകോ വില്പനശാലകളുടെ ഉദ്ഘാടനമാണ് നടക്കുക. മന്ത്രിമാര്, അതതു ജില്ലകളിലെ എം.പിമാര്, എം.എല്. എമാര്, തദ്ദേശ സ്വയംഭരണ സ്ഥാപന പ്രതിനിധികള്, രാഷ്ട്രീയ പാര്ട്ടി പ്രതിനിധികള് സന്നിഹിതരാകും.
