ദില്ലി: സുദീപ്തോ സെന്നിന്റെയും വിപുല്‍ അമൃത്ലാല്‍ ഷായുടെയും ചിത്രം ദി കേരള സ്റ്റോറിയെ പ്രശംസിച്ച് ബിജെപി ദേശീയ അധ്യക്ഷന്‍ ജെ പി നദ്ദ. ബോംബുകളോ വെടിക്കോപ്പുകളോ ഉപയോഗിക്കാതെയുള്ള പുതിയ തരം വിഷലിപ്ത തീവ്രവാദത്തെക്കുറിച്ചാണ് സിനിമ വെളിവാക്കുന്നതെന്ന് അദ്ദേഹം അഭിപ്രായപ്പെട്ടു. ബംഗളൂരുവില്‍ സിനിമ കണ്ടതിനു ശേഷം പ്രതികരിക്കുകയായിരുന്നു നദ്ദ.
”വെടിക്കോപ്പുകളില്ലാത്ത തീവ്രവാദത്തിന്റെ പുതിയ രീതി, ‘കേരള സ്റ്റോറി’ ആ വിഷലിപ്തമായ തീവ്രവാദത്തെ തുറന്നുകാട്ടുന്നതാണ്. ഇത്തരത്തിലുള്ള ഭീകരത ഒരു സംസ്ഥാനവുമായോ മതവുമായോ ബന്ധപ്പെട്ടതല്ല.’ മാധ്യമപ്രവര്‍ത്തകരോട് സംസാരിക്കവെ നദ്ദ പറഞ്ഞു. നേരത്തെ തിരഞ്ഞെടുപ്പ് ആസന്നമായ കര്‍ണാടകയിലെ ഒരു റാലിയില്‍ പ്രസംഗിക്കവേ, ‘ദി കേരള സ്റ്റോറി’ എന്ന സിനിമ തീവ്രവാദ ഗൂഢാലോചനയെ അടിസ്ഥാനമാക്കിയുള്ളതാണെന്ന് പ്രധാനമന്ത്രി നരേന്ദ്ര മോദി പറഞ്ഞിരുന്നു.
