ന്യൂഡല്ഹി: ഡല്ഹി കലാപം റിപ്പോര്ട്ട് ചെയ്തതിന്റെ പേരില് മലയാളം ന്യൂസ് ചാനലുകളായ മീഡിയ വണിനും ഏഷ്യാനെറ്റ് ന്യൂസിനും ഏര്പ്പെടുത്തിയ വിലക്കില് ഭാഗികമായ മാറ്റം. കേന്ദ്രസര്ക്കാര് വിലക്കേര്പ്പെടുത്തിയ ഏഷ്യാനെറ്റ് ന്യൂസ് സംപ്രേഷണം പുനരാരംഭിച്ചു. ശനിയാഴ്ച പുലര്ച്ചെ രണ്ടിനു ശേഷമാണ് ഏഷ്യാനെറ്റ് ന്യൂസ് സംപ്രേഷണം പുനരാരംഭിച്ചത്. പുലര്ച്ചെ 2.44 മുതല് ഏഷ്യാനെറ്റ് ന്യൂസ് വീഡിയോ സ്ട്രീമിങ്ങും ഇന്റര്നെറ്റില് ലഭ്യമായി. എന്നാല് മീഡിയ വണ്ണിന്റെ വിലക്ക് തുടരുകയാണ്, സംപ്രേഷണം പുനരാരംഭിച്ചിട്ടില്ല.
വടക്കു കിഴക്കന് ഡല്ഹിയിലെ സംഘര്ഷങ്ങള് റിപ്പോര്ട്ട് ചെയ്തതില് ഈ ചാനലുകള് വീഴ്ച വരുത്തിയെന്നും കേബിള് ടെലിവിഷന് നെറ്റ് വര്ക്ക് ചട്ടങ്ങളുടെ ലംഘനമുണ്ടായെന്നുമുള്ള വിലയിരുത്തലിലാണ് 48 മണിക്കൂര് സംപ്രേഷണം നിര്ത്തിവയ്ക്കാന് വാര്ത്താ വിതരണ പ്രക്ഷേപണ മന്ത്രാലയം വെള്ളിയാഴ്ച ഉത്തരവിട്ടത്.
വെള്ളിയാഴ്ച വൈകുന്നേരം 7.30 മുതല് ഞായറാഴ്ച വൈകുന്നേരം 7.30 വരെയായിരുന്നു സംപ്രേഷണ വിലക്ക്. 2 ചാനലുകള്ക്കും കഴിഞ്ഞ 28ന് മന്ത്രാലയം നോട്ടിസ് നല്കിയിരുന്നു. മറുപടി കേട്ടശേഷമായിരുന്നു നടപടി. ആരാധനാലയങ്ങള്ക്കു നേരെയുള്ള അതിക്രമങ്ങള് എടുത്തുകാട്ടിയെന്നും ഒരു വിഭാഗത്തോടു പക്ഷം പിടിച്ചെന്നുമാണ് 2 ചാനലുകളുടെയും റിപ്പോര്ട്ടിങ്ങിനെക്കുറിച്ച് മന്ത്രാലയത്തിന്റെ വിലയിരുത്തല്. ആര്എസ്എസിനെയും ഡല്ഹി പോലീസിനെയും വിമര്ശിച്ചത് വലിയ വീഴ്ചയാണെന്നാണ് മീഡിയ വണിന് നല്കിയ നോട്ടീസില് കേന്ദ്രം പറയുന്നത്.
