ആലപ്പുഴ: എസ്എഫ്ഐ നേതാവ് നിഖില് തോമസിനായി സിപിഎം നേതാവ് ശുപാര്ശ നടത്തിയെന്ന വെളിപ്പെടുത്തലുമായി എംഎസ്എം കോളേജ് മാനേജര് ഹിലാല് ബാബു. നിഖിലിനായി സിപിഎം നേതാവ് ശുപാര്ശ ചെയ്തിരുന്നു. അയാളുടെ പേര് വെളിപ്പെടുത്താന് തയ്യാറല്ല. പേര് പറയാത്തത് അയാളുടെ രാഷ്ട്രീയ ഭാവി പോകും എന്നതിനാലാണെന്നും ഹിലാല് ബാബു വ്യക്തമാക്കി. എസ്എഫ്ഐ കായംകുളം ഏരിയാ സെക്രട്ടറിയായിരുന്ന നിഖില് തോമസ് കലിംഗ സര്വകലാശാലയില്നിന്നുള്ള വ്യാജ ബിരുദ സര്ട്ടിഫിക്കറ്റ് നല്കി എംഎസ്എം കോളേജില് എംകോമിന് പ്രവേശനം തേടാന് ശ്രമിച്ച സംഭവമാണ് വിവാദമായത്.
അതേസമയം വ്യാജ ഡിഗ്രി വിവാദത്തില് എസ്എഫ്ഐ നേതാവായ നിഖില് തോമസിനെ തള്ളി സി പി എം രംഗത്തെത്തി. കോളേജ് പ്രവേശനത്തിന് പാര്ട്ടിയുടെ സഹായം തേടിയ നിഖില് തോമസ് ചെയ്തത് കൊടും ചതിയാണെന്ന് സിപിഎം കായംകുളം ഏരിയ സെക്രട്ടറി പി അരവിന്ദാക്ഷന് പറഞ്ഞു. യുവാവിനെതിരെ അന്വേഷണമുണ്ടോകുമെന്നും ഇയാളെ ഏതെങ്കിലും പാര്ട്ടി പ്രവര്ത്തകര് ബോധപൂര്വം സഹായിച്ചിട്ടുണ്ടെങ്കില് അവര്ക്കെതിരെ നടപടിയുണ്ടാകുമെന്നും അദ്ദേഹം മാധ്യമങ്ങളോട് പറഞ്ഞു.
