കോഴിക്കോട്: കോഴിക്കോട് നിപ റിപ്പോര്ട്ട് ചെയ്യപ്പെട്ടതിന്റെ പശ്ചാത്തലത്തില് ജില്ലയില് നിയന്ത്രണങ്ങള് കടുപ്പിക്കുന്നു. കണ്ടൈയ്ന്മെന്റ് സോണുകളില് ആരാധനാലയങ്ങളിലടക്കം കൂടിച്ചേരലുകള് അനുവദിക്കില്ല. കള്ള് ചെത്തുന്നതും വില്ക്കുന്നതും നിര്ത്തി വയ്ക്കണമെന്നുമാണ് ജില്ലാ ഭരണകൂടത്തിന്റെ പുതിയ നിര്ദ്ദേശങ്ങളിലുള്ളത്. ആശുപത്രികളില് സന്ദര്ശകരെ അനുവദിക്കില്ല, ഒരു ബൈസ്റ്റാന്ഡറെ മാത്രമായിരിക്കും ആശുപത്രികളില് അനുവദിക്കുക. അതേസമയം, കോഴിക്കോട് ബീച്ചുകളിലും നിയന്ത്രണമേര്പ്പെടുത്തിയിട്ടുണ്ട്.
പൊതുപരിപാടികള് ജില്ലാ ഭരണകൂടത്തിന്റെ അനുമതിയോടുകൂടി മാത്രമായിരിക്കും നടക്കുക. നിപ മരണങ്ങളുടെ പശ്ചാത്തലത്തില് നാളെ രാവിലെ 10 മണിക്ക് മന്ത്രിമാരും ജനപ്രതിനിധികളും രാഷ്ട്രീയപാര്ട്ടി പ്രതിനിധികളും പങ്കെടുക്കുന്ന സര്വ്വകക്ഷിയോഗം കോഴിക്കോട് നടക്കും. 11 മണിക്ക് മന്ത്രി മുഹമ്മദ് റിയാസിന്റെ നേതൃത്വത്തില് രോഗബാധിത ഗ്രാമപഞ്ചായത്തുകളിലെ പ്രസിഡണ്ടുമാരുടെ യോഗം നടക്കും.