അയർലൻഡ്: പരീക്ഷണങ്ങൾ വിട്ടുമാറാതെ നെൽസന്റെ ജീവിതം. 7 വർഷം മുൻപ് ആദ്യ ഭാര്യയെ വാഹനാപകടത്തിൽ നഷ്ടമായതിന്റെ വേദനയിൽ നിന്നും കരകയറുന്നതിനിടെ കാൻസർ രോഗം രണ്ടാമത്തെ ഭാര്യയെയും തട്ടിയെടുത്തതിന്റെ ആഘാതത്തിലാണ് നെല്സന്. നോർത്തേൺ അയർലൻഡിലെ ഐൻട്രിമിൽ താമസിക്കുന്ന കരിപ്പാടം തടത്തിൽ നെൽസൺ ജോണിന്റെ ഭാര്യ നിഷ (42) ആണ് വിധിക്ക് കീഴടങ്ങിയത്.
2019-ൽ ഒരു കാർ അപകടത്തിലാണ് നെൽസന്റെ ആദ്യ ഭാര്യ സിനി മരിക്കുന്നത്. അന്ന് കേവലം 37 വയസ്സ് മാത്രമായിരുന്നു സിനിയുടെ പ്രായം. അമ്മയുടെ അരികിലിരുന്ന് വിതുമ്പുന്ന 3 പിഞ്ചുകുഞ്ഞുങ്ങളുടെ ചിത്രം അന്ന് ലോകമലയാളികളുടെ കണ്ണ് നനയിച്ചിരുന്നു. തളർന്നുപോയ തന്റെ ജീവിതം മക്കൾക്ക് വേണ്ടിയെങ്കിലും തിരിച്ചു പിടിക്കാനാണ് നെൽസൺ നിഷയെ ജീവിതപങ്കാളിയായി തിരഞ്ഞെടുത്തത്. കുഞ്ഞുങ്ങൾക്ക് അമ്മയുടെ സ്നേഹം നൽകി ജീവിതം പ്രകാശത്തിലേക്ക് നീങ്ങുമ്പോഴാണ് കാൻസറിന്റെ രൂപത്തിൽ വിധി വീണ്ടും വില്ലനായെത്തിയത്. നെൽസന്റെയും കുട്ടികളുടെയും തീരാദുഃഖത്തിൽ യു.കെ കെ.സി.എ ഭാരവാഹികളും പ്രവാസി സംഘടനകളും അനുശോചനം രേഖപ്പെടുത്തി.
