ന്യൂഡല്‍ഹി : കന്യാസ്ത്രീകളോട് അതിക്രമം കാണിച്ച എ.ബി.വി.പി പ്രവര്‍ത്തകര്‍ക്കും റെയില്‍വേ പോലീസിനും എതിരെ നടപടി ആവശ്യപ്പെട്ട് ഓള്‍ ഇന്ത്യ കാത്തലിക് യൂണിയന്‍ (എ.ഐ.സി.യു) പ്രധാനമന്ത്രി നരേന്ദ്ര മോദിക്കും കേന്ദ്ര ആഭ്യന്തര മന്ത്രി അമിത് ഷാക്കും കത്തെഴുതി. സ്വന്തമായി പ്രതിരോധിക്കാന്‍ കഴിയാത്ത മനുഷ്യരെ ഭീകരവത്കരിക്കുന്നവര്‍ക്ക് സ്വൈര്യവിഹാരത്തിന് അനുമതി നല്‍കരുതെന്ന് എ.ഐ.സി.യു ദേശീയ പ്രസിഡന്‍റ് ലാന്‍സി ഡി. കന്‍ഹയും വക്താവ് ജോണ്‍ ദയാലും കത്തില്‍ ആവശ്യപ്പെട്ടു.
കേരളത്തില്‍ തെരഞ്ഞെടുപ്പ് പ്രചാരണത്തിനെത്തിയ കേന്ദ്ര ആഭ്യന്തര മന്ത്രി അമിത് ഷാ കുറ്റക്കാര്‍ക്കെതിരെ നടപടി എടുക്കുമെന്ന് പറഞ്ഞുവെങ്കിലും പിന്നീട് നടപടിയൊന്നുമുണ്ടായില്ല. മാത്രമല്ല, അമിത് ഷാക്ക് പിറകെവന്ന റെയില്‍വേ മന്ത്രി പിയൂഷ് ഗോയല്‍ അത്തരമൊരു അതിക്രമം നടന്നിട്ടേ ഇല്ലെന്ന് പറഞ്ഞ് അക്രമത്തെ ന്യായീകരിക്കുകയാണ് ചെയ്തതെന്നും കത്തില്‍ പറയുന്നു.
