കോട്ടയം: കാഴ്ച പരിമിതിയുള്ള വിദ്യാര്‍ഥികള്‍ക്കായുള്ള സംസ്ഥാനത്തെ ഏക സര്‍ക്കാര്‍ ഹൈസ്കൂളായ ഒളശ്ശ അന്ധവിദ്യാലയത്തില്‍ അധ്യാപകരില്ലാതെ രണ്ടാം അധ്യയനവര്‍ഷത്തിന് തുടക്കമായി. കഴിഞ്ഞവര്‍ഷവും ഇവിടെ അധ്യാപകരുണ്ടായിരുന്നില്ല. സര്‍ക്കാര്‍ ഉത്തരവുപ്രകാരം ഹൈസ്കൂളിലും യു.പിയിലും അഞ്ചുവീതം അധ്യാപക തസ്തികകളുണ്ട്. എന്നാല്‍ 10 അധ്യാപകര്‍ വേണ്ടിടത്ത് ആകെയുള്ളത് ഒരാളാണ്. മൂന്ന് സ്പെഷലിസ്റ്റ് അധ്യാപകരും.
കോവിഡ് പ്രതിസന്ധി മൂലം കഴിഞ്ഞ അധ്യയനവര്‍ഷം സ്കൂളുകളിലെ താല്‍ക്കാലിക നിയമനം സര്‍ക്കാര്‍ ഉപേക്ഷിച്ചതോടെയാണ് ഇവിടെയും പ്രതിസന്ധിയായത്. മറ്റ് കുട്ടികള്‍ ഓണ്‍ലൈനില്‍ പഠിക്കുമ്പോള്‍ ഒളശ്ശ സ്കൂളിലെ കുട്ടികള്‍ക്ക് അതിനവസരം ഉണ്ടായിരുന്നില്ല. വിവരമറിഞ്ഞെത്തിയ മുന്‍ താല്‍ക്കാലിക അധ്യാപകര്‍ കുട്ടികള്‍ക്ക് സൗജന്യമായി ക്ലാസ് നല്‍കുകയായിരുന്നു.
ഇവരുടെ നേതൃത്വത്തില്‍ എട്ട് കുട്ടികളെ എസ്.എസ്.എല്‍.സി പരീക്ഷ എഴുതിക്കുകയും ചെയ്തു. 1962ലാണ് ഒളശ്ശ അന്ധവിദ്യാലയം ആരംഭിക്കുന്നത്. നിലവില്‍ ജില്ലക്ക് പുറത്തുനിന്നടക്കം 29 വിദ്യാര്‍ഥികളുണ്ട്. കൂടുതല്‍ വിദ്യാര്‍ഥികളുള്ളത് ഒന്‍പതാം ക്ലാസിലാണ് – ഒന്‍പതുപേര്‍. കോവിഡും ലോക്ഡൗണും വഴി മുടക്കിയതിനാല്‍ ഒന്നാംക്ലാസിലേക്ക് പുതിയ അഡ്മിഷന്‍ ഉണ്ടായില്ല. മൂന്ന്, നാല് ക്ലാസിലും വിദ്യാര്‍ഥികളില്ല. മലയാളം മീഡിയത്തിലാണ് പഠനം. പൂര്‍വവിദ്യാര്‍ഥി കൂടിയായ ഇ.ജെ. കുര്യന്‍ ആണ് പ്രധാനാധ്യപകന്‍.
