ദില്ലി : ഇന്ത്യയിൽ ആദ്യത്തെ ഒമിക്രോൺ മരണം സ്ഥിരീകരിച്ചു. മഹാരാഷ്ട്രയിലെ പിംപ്രി-ചിന്ച്ച്വാദിലാണ് ആണ് ഒമിക്രോൺ ബാധിതൻ മരിച്ചത്. നൈജീരിയയിൽ നിന്നെത്തിയ 52കാരൻ ഈ മാസം 28 നാണ് മരിച്ചത്. സാമ്പിൾ വൈറോളജി ഇൻസ്റ്റിറ്റ്യൂട്ടിൽ നടത്തിയ പരിശോധനയിലാണ് രോഗം സ്ഥിരീകരിച്ചത്.
രാജ്യത്തെ കൊവിഡ് കേസുകളിലെ കുതിപ്പ് ഒമിക്രോണ് മൂലമെന്ന് ആരോഗ്യമന്ത്രാലയം അറിയിച്ചു. ഒമിക്രോണ് വ്യാപനത്തിന്റെ കൂടി പശ്ചാത്തലത്തില് ദില്ലിക്കും ഏഴ് സംസ്ഥാനങ്ങള്ക്കും കേന്ദ്രം വീണ്ടും ജാഗ്രത നിര്ദ്ദേശം നല്കി. ദില്ലിയില് സാമൂഹിക വ്യാപന സാധ്യതയുണ്ടെന്ന് സര്ക്കാര് വ്യക്തമാക്കി.
ഒമിക്രോണ് ആദ്യം സ്ഥിരീകരിച്ച ദക്ഷിണാഫ്രിക്കയില് ഇപ്പോള് റിപ്പോര്ട്ട് ചെയ്യുന്ന കൊവിഡ് കേസുകളില് 96 ശതമാനവും ഒമിക്രോണാണ്. വ്യാപന തീവ്രത കൂടിയ വകഭേദം രാജ്യത്തും കൂടുല് സ്ഥിരീകരിക്കുന്നതോടെ കൊവിഡ് കേസുകള് കുതിച്ചുയരുകയാണ്. പ്രതിദിന കൊവിഡ് രോഗികളുടെ എണ്ണം പതിമൂവായിരത്തി ഒരുനൂറ്റി അന്പത്തിനാലില് എത്തിയിരിക്കുന്നത് ഇതിന്റെ സൂചനയാണ്. ഒമിക്രോണിനൊപ്പം ഡല്റ്റയും ഭീഷണിയാകുമ്പോള് 8 ജില്ലകളില് ടെസ്റ്റ് പൊസിറ്റിവിറ്റി നിരക്ക് പത്ത് ശതമാനത്തിന് മുകളിലും, പതിനാല് ജില്ലകളില് അഞ്ചിനും പത്തിനും ഇടയ്ക്കുമാണ്.
തിങ്കളാഴ്ച രാജ്യത്ത് അഞ്ഞൂറ് കടന്ന ഒമിക്രോണ് ബാധിതരുടെ എണ്ണം രണ്ട് ദിവസം കൊണ്ടാണ് ആയിരത്തിനടുത്ത് എത്തിയിരിക്കുന്നത്. അതിനിടെ, കോവിഡ് പടരാതിരിക്കാന് ഇന്നുമുതല് രാത്രിയാഘോഷങ്ങള്ക്ക് കേരളവും പൂട്ടിട്ടു. ഇന്ന് മുതല് ഞായര് വരെയുള്ള ദിവസങ്ങളില് രാത്രി 10 മുതല് പുലര്ച്ചെ അഞ്ചുവരെയാണ് നിയന്ത്രണം. മത- രാഷ്ട്രീയ- സാംസ്കാരിക കൂട്ടായ്മകള്ക്കും അനുമതിയില്ല. അത്യാവശ്യയാത്രക്കാര് സ്വയം സാക്ഷ്യപ്പെടുത്തിയ സത്യവാങ്മൂലം കരുതണം. ശബരിമല, ശിവഗിരി തീര്ഥാടകര്ക്ക് ഇളവ് അനുവദിച്ചിട്ടുണ്ട്. കെ.എസ്.ആര്.ടി.സി ദീര്ഘദൂര സര്വീസുകള്ക്ക് നിയന്ത്രണം ബാധകമല്ല.
