ഡല്ഹി : ഡല്ഹിയില് 24 പേര്ക്ക് കൂടി കൊവിഡ് ഒമിക്രോണ് വകഭേദം സ്ഥിരീകരിച്ചു. ഇതോടെ രാജ്യത്താകെ ഒമിക്രോണ് ബാധിതരുടെ എണ്ണം ഇരുന്നൂറു കടന്നിട്ടുണ്ട്. ഏറ്റവും കൂടുതല് ഒമിക്രോണ് ബാധിതര് ഡല്ഹിയിലും മുംബൈയിലും ആണ്. ഒമിക്രോണിന് ഡെല്ട്ട വകഭേദത്തെക്കാള് മൂന്നിരട്ടി വ്യാപന ശേഷിയുള്ളതായി ആരോഗ്യ മന്ത്രാലയം അറിയിച്ചു. ജില്ലാ പ്രാദേശിക അടിസ്ഥാനത്തില് കര്ശന നിരീക്ഷണവും പരിശോധനയും ഉറപ്പാക്കണമെന്ന് കേന്ദ്രസര്ക്കാര് സംസ്ഥാനങ്ങള്ക്ക് നിര്ദേശം നല്കി.
10 ശതമാനത്തിന് മുകളില് പോസിറ്റിവിറ്റി നിരക്കുള്ള സ്ഥലങ്ങളില് നിയന്ത്രണങ്ങള് കര്ശനമാക്കാനാണ് കേന്ദ്രത്തിന്റെ നിര്ദേശം. രാജ്യത്താകെ 137 കോടി പേര്ക്ക് കൊവിഡ് വാക്സിന് എത്തിക്കാനായി എന്ന് കഴിഞ്ഞ ദിവസം കേന്ദ്ര ആരോഗ്യമന്ത്രി മന്സൂഖ് മാണ്ഡവ്യ പാര്ലമെന്റില് അറിയിച്ചിരുന്നു. രണ്ട് തദ്ദേശീയ വാക്സിനുകള്ക്ക് കൂടി അടിയന്തിര ഉപയോഗത്തിന് ഉടന് അനുമതി നല്കും. പ്രതിമാസം 45 കോടി വാക്സിന് ഉല്പാദിപ്പിക്കാനുള്ള ശേഷിയിലേക്കാണ് രാജ്യം എത്തുന്നത്. കൊവിഡ് പ്രതിരോധത്തിനായി അടിസ്ഥാന സൗകര്യം ഒരുക്കാന് 23,000 കോടി രൂപ സംസ്ഥാനങ്ങള്ക്കായി അനുവദിച്ചിട്ടുണ്ട്.
