പന്തളം : കഴിഞ്ഞ വര്‍ഷം ശബരിമലയില്‍ നടന്ന സമരങ്ങള്‍ ഓര്‍മപ്പെടുത്തി പന്തളം കൊട്ടാരം. വ്യക്തികള്‍ ആരായാലും മണ്ഡലകാലം മറക്കരുതെന്ന് കൊട്ടാരം പുറത്തിറക്കിയ പ്രസ്താവനയില്‍ പറയുന്നു. 2018 ഒക്ടോബര്‍ രണ്ടിന് പന്തളത്ത് സംഘടിപ്പിച്ച ആദ്യ നാമജപ ഘോഷയാത്രക്ക് നേതൃത്വം നല്‍കിയത് പന്തളം കൊട്ടാരവും ക്ഷേത്രാചാര സംരക്ഷണ സമിതിയും അനവധി ക്ഷേത്രോപദേശക സമിതികളും വിവിധ ഹൈന്ദവ സംഘടനകളും എന്‍.എസ്.എസ് അടക്കമുള്ള സമുദായ സംഘടനകളും ചേര്‍ന്നാണെന്ന് കൊട്ടാരം നിര്‍വാഹക സംഘം അറിയിച്ചു.
രാഷ്ട്രീയാതീതമായി എല്ലാ അയ്യപ്പഭക്തരുമായും ആത്മബന്ധമുണ്ട്. എന്നാല്‍ അത് അവരുടെ രാഷ്ട്രീയ നിലപാടിനുള്ള പിന്തുണയല്ല. ഒരു കൊടിയുടെയും പിന്നാലെ പോകരുത് എന്നതായിരുന്നു നാമജപ ഘോഷയാത്രക്ക് ഇറങ്ങുന്നതിനുമുമ്പ് നിര്‍വാഹക സംഘം പ്രസിഡന്‍റ് പി. ശശികുമാര വര്‍മ്മ പ്രഖ്യാപിച്ചത്. ഒരു രാഷ്ട്രീയ പാര്‍ട്ടിയുടെയും നിലപാടിനൊപ്പമല്ല, മറിച്ച്‌ അയ്യപ്പഭക്തരുടെ വിശ്വാസത്തിനൊപ്പമാണ് നിലകൊണ്ടത്.
അയ്യപ്പവിശ്വാസത്തെയും ആചാരാനുഷ്ഠാനങ്ങളെയും സംരക്ഷിക്കുകയും ശബരിമലയെ തകര്‍ക്കാനുള്ള ശ്രമങ്ങളെ ഭക്തര്‍ക്കൊപ്പം നിന്ന് ചെറുക്കുകയുമാണ് കര്‍ത്തവ്യം. ഈ പ്രവര്‍ത്തനത്തിനിടയില്‍ ഒപ്പംചേരുന്നവരും വിട്ടുപോകുന്നവരുമായ വ്യക്തികളുടെ കക്ഷിരാഷ്ട്രീയത്തിലും അവസരവാദത്തിലും ബന്ധമില്ല. അത്തരത്തില്‍ വിവിധ രാഷ്ട്രീയ പാര്‍ട്ടികളിലേക്ക് ചേക്കേറുന്നവര്‍ക്ക് കൊട്ടാരം നിര്‍വാഹക സംഘത്തിന്റെയും അധ്യക്ഷന്റെയും പിന്തുണയുണ്ടെന്ന് പ്രചരിപ്പിക്കുന്നതിനെ അപഹാസ്യം എന്നേ പറയാന്‍ കഴിയൂ.
യുവതി പ്രവേശന വിഷയത്തില്‍ ഭരണകൂടത്തിന്റെ സ്വേച്ഛാധിപത്യ നിലപാടുകള്‍മൂലം ഭക്തരുടെ മനസ്സിനേറ്റ മുറിവ് മായാതെ നില്‍ക്കുകയാണ്. നാമം ജപിച്ചതിന്റെ പേരില്‍ ആയിരക്കണക്കിന് ഭക്തര്‍ക്കും അമ്മമാര്‍ക്കുമെതിരെ ചുമത്തിയ കേസുകള്‍ പിന്‍വലിക്കുന്നതുവരെ അവരോടൊപ്പം ഉറച്ചുനില്‍ക്കുമെന്നും പന്തളം കൊട്ടാരം പ്രസ്താവനയില്‍ അറിയിച്ചു.
