നോയ്ഡ: പെൺസുഹൃത്തിനെ റൈഡിന് കൊണ്ടുപോകാൻ വേണ്ടി ആഢംബര കാർ മോഷ്ടിച്ച സംഭവത്തിൽ യുപിയിൽ മൂന്നുപേർ അറസ്റ്റിൽ. ശ്രേയ്, അനികേത് നഗർ, ദിപാൻഷു ഭാട്ടി എന്നീ യൂണിവേഴ്സിറ്റി വിദ്യാർഥികളാണ് അറസ്റ്റിലായത്. സുഹൃത്തിനെ സഹായിക്കാൻ വേണ്ടിയാണ് മറ്റു രണ്ടു സുഹൃത്തുക്കളും കാർ മോഷണത്തിനിറങ്ങിയത്. സുഹൃത്തിന്റെ കാമുകിയെ റൈഡിന് കൊണ്ടു പോകാനായിരുന്നു കാർ മോഷ്ടിച്ചതെന്നാണ് റിപ്പോർട്ട്. സെപ്റ്റംബർ 26-നായിരുന്നു സംഭവം. ഗ്രേറ്റർ നോയിഡയിലെ കാർ ബസാറിലെ ഷോറുമിൽ നിന്നുള്ള കാറാണ് മോഷ്ടിച്ചത്. രണ്ടുപേർ ഷോറൂമിലെ ജീവനക്കാരനോട് ടെസ്റ്റ് ഡ്രൈവ് ആവശ്യപ്പെടുകയായിരുന്നു.
ഷോറൂമിൽ നിന്ന് കാറുമായി ജീവനക്കാരൻ പുറത്തിറങ്ങും നേരത്ത്, ഇരുവരും ഗേറ്റിനരികെ ഹെൽമെറ്റ് ധരിച്ച് കാത്തിരിക്കുകയായിരുന്നു. വാഹനത്തിൽ ഇരുവരും കയറിയ ശേഷം ഒരാൾ ഡ്രൈവറുടെ സീറ്റിലും മറ്റേ ആൾ തൊട്ടടുത്തുള്ള സീറ്റിലും ഇരുന്നു. ഇതിന്റെ സി.സി.ടിവി. ദൃശ്യങ്ങൾ പുറത്തുവന്നിരുന്നു. ശേഷം പകുതിയിൽ വെച്ച് ഡ്രൈവറെ വെളിയിൽ തള്ളി കാറുമായി കടന്നുകളയുകയായിരുന്നുവെന്നാണ് റിപ്പോർട്ട് ചെയ്യുന്നത്. സുഹൃത്തിന്റെ പെൺസുഹൃത്തിന് റൈഡിന് വേണ്ടിയാണ് കാർ മോഷ്ടിച്ചതെന്നാണ് വിവരം. എന്നാൽ ഇക്കാര്യത്തിൽ പോലീസിന്റെ ഭാഗത്ത് നിന്ന് ഔദ്യോഗികമായി സ്ഥിരീകരണം ഉണ്ടായിട്ടില്ല. നൂറോളം സി.സി.ടിവി. ദൃശ്യങ്ങളാണ് പോലീസ് പരിശോധിച്ചത്. തുടർന്ന് പോലീസ് കാർ കണ്ടെത്തിയിരുന്നു. കാറിന്റെ ഗ്ലാസ്സിൽ നഗർ എന്നും എഴുതിയിരുന്നു. തുടർന്ന് മുന്നുപേരെ പോലീസ് അറസ്റ്റ് ചെയ്യുകയായിരുന്നു. സംഭവത്തിൽ അന്വേഷണം പുരോഗമിക്കുന്നുണ്ട്.
