ഇലന്തൂർ : എൻജിനിയറിങ് കുടുംബത്തിൽ നിന്നും സിവിൽ സർവീസ് നേട്ടം തിളക്കം. ഇലന്തൂർ ഉടയൻകാവിൽ ഗോപു ആർ ഉണ്ണിത്താനാണ് ഈ നേട്ടം കരസ്ഥമാക്കിയത്. കുടുംബത്തിൽ മൂന്നാം തലമുറയിലെ 12 എൻജിനിയർമാരുടെ
കൂട്ടത്തിൽ നിന്നുമാണ് ഗോപു അഖിലേന്ത്യ തലത്തിൽ 346 ആം റാങ്കോടെ സിവിൽ സർവീസ് നേടിയത്. എൻജിനിയറിങ്ങിന് ശേഷം ഈ രംഗത്ത് ഗവേഷണം നടത്തുന്നവർ, അധ്യാപനം നടത്തുന്നവർ, സോഫ്റ്റ് വെയർ രംഗത്ത് പ്രവർത്തിക്കുന്നവർ , വ്യവസായരംഗം തെരഞ്ഞെടുത്തവർ എല്ലാം ഈ കൂട്ടത്തിലുണ്ട്.
എൻജിനിയറിങ്ങിൽ ബിരുദ, ബിരുദാനന്തര പഠനം നടത്തുന്നവരും അടുത്ത തലമുറയിൽ പെടുന്നു. ഇവരുടെ ഇടയിൽ നിന്നാണ് തിരുവന്തപുരം സി ഇ ടിയിൽ നിന്നും ബി.ടെക്കും ബാംഗ്ലൂർ ഐ ഐ എസ് ഇ യിൽ നിന്നും എം .എസ്സും നേടിയ ശേഷം ഗോപു സിവിൽ സർവീസ് ലക്ഷ്യം വെച്ചത്.
തിരുവനന്തപുരം സിവിൽ സർവീസ് അക്കാദമിയിൽ നിന്നും പരിശീലനം നേടിയാണ് ഇത് സാധ്യമാക്കിയത്.
ഇലന്തൂർ ഉടയൻകാവിൽ കുടുംബാംഗം ചെറുകോൽ പോസ്റ്റ് മിസ്ട്രസ്സ് ടി.കെ.സുഷമാ ദേവിയുടെയും മാവേലിക്കര പുതിയവീട്ടിൽ തെക്കേതിൽ അഡ്വ.പി.ജി.രവീന്ദ്രൻ ഉണ്ണിത്താന്റെയും മകനാണ് ഗോപു. ഫുഡ് ടെക്നോളജിയിൽ എൻജിനിയറായ ദീപു ആർ.ഉണ്ണിത്താനാണ് സഹോദരൻ.
