പത്തനംതിട്ട : എല്ലാ ലൈഫ് ഗുണഭോക്താക്കളിലേക്കും ടോയിലറ്റ് എത്തിക്കുക ലക്ഷ്യമിട്ട് വിപുലമായ പദ്ധതി തയ്യാറാക്കി പത്തനംതിട്ട ജില്ലാ ശുചിത്വ മിഷൻ. ജില്ലയിലെ ഗ്രാമപഞ്ചായത്തുകളിലെ ലൈഫ് ഗുണഭോക്തൃ ലിസ്റ്റിൽ ഉൾപ്പെട്ടിട്ടും ശൗചാലയത്തിന് പണം ലഭ്യമാകാത്ത നിരവധി ഗുണഭോക്താക്കളുണ്ട്. ഇവരെ ലക്ഷ്യമിട്ട് വിപുലമായ ബ്ലോക്കുതല ഗുണഭോക്തൃ സംഗമം നടത്താൻ ഒരുങ്ങുകയാണ് ജില്ലാ ശുചിത്വ മിഷൻ.
പത്തനംതിട്ട ജില്ലയിലെ എല്ലാവർക്കും അടച്ചുറപ്പുളളതും വൃത്തിയുളളതുമായ ശൗചാലയം ലഭ്യമാക്കുകയാണ് പദ്ധതിയിലൂടെ ജില്ലാ മിഷൻ ലക്ഷ്യമിടുന്നത്. ബ്ലോക്ക് പഞ്ചായത്ത് തലത്തിൽ സംഘടിപ്പിക്കപ്പെടുന്ന ഗുണഭോക്തൃ സംഗമത്തിലൂടെ വ്യക്തികൾക്ക് സ്വച്ഛ് ഭാരത് മിഷൻ (ഗ്രാമീൺ) (എസ്ബിഎം (ജി)) പദ്ധതിയിലൂടെ ശൗചാലയം നിർമ്മിക്കാനുളള തുക ലഭ്യമാക്കാനുളള നടപടികൾ സ്വീകരിക്കും.
ജില്ലയിലെ ഗ്രാമപഞ്ചായത്തുകളുടെ വാർഷിക പദ്ധതിയിൽ ഉൾപ്പെട്ട ലൈഫ് ഗുണഭോക്താക്കളാണെങ്കിൽ അവർക്ക് ആവശ്യമായ രേഖകൾ സമർപ്പിച്ചാൽ മൂന്ന് ദിവസത്തിനുളളിൽ തുക ലഭ്യമാക്കുന്നതായിരിക്കും. വാർഷിക പദ്ധതിയിൽ ഉൾപ്പെടാത്ത ഗുണഭോക്താക്കൾക്ക് ആവശ്യമായ രേഖകൾ സമർപ്പിച്ചാൽ ഫണ്ട് ലഭ്യമാകുന്നതിന് ആവശ്യമായ പദ്ധതി അതാത് തദ്ദേശ സ്ഥാപനങ്ങളെക്കൊണ്ട് ഏറ്റെടുപ്പിക്കുന്നതിന് ഉചിതമായ നടപടിയും സംഗമത്തിൽ വെച്ച് സ്വീകരിക്കുന്നതായിരിക്കും. ഗുണഭോക്തൃ സംഗമത്തിൽ പങ്കെടുക്കുന്ന യോഗ്യരായ എല്ലാവർക്കും ശൗചാലയം ലഭ്യമാക്കുക എന്നതാണ് പരിപാടിയിലൂടെ ശുചിത്വ മിഷൻ ലക്ഷ്യമിടുന്നത്. പത്തനംതിട്ട ജില്ലയിൽ നടത്തുന്ന ബ്ലോക്കുതല സംഗമത്തിന്റെ സമയക്രമവും ജില്ല ശുചിത്വ മിഷൻ പ്രഖ്യാപിച്ചു. ഇലന്തൂർ ബ്ലോക്കിൽ ഡിസംബർ മാസം 18 ന് ആണ് സംഗമം ന‌‌ടക്കുക. പന്തളം, മല്ലപ്പള്ളി, പറക്കോട്, കോന്നി, റാന്നി, പുളിക്കീഴ് ബ്ലോക്ക് പഞ്ചായത്തുകളിൽ ഡിസംബർ 19 ന് ആണ് പരിപാടി സംഘടിപ്പിക്കുന്നത്. കോയിപ്രം ബ്ലോക്ക് പഞ്ചായത്തിൽ ഡിസംബർ മാസം 20 ന് ആണ് സംഗമം സംഘടിപ്പിക്കുന്നത്. അതാത് ബ്ലോക്ക് പഞ്ചായത്ത് ഓഫീസുകളിൽ വെച്ചാകും സംഗമം നടത്തുക.
