പത്തനംതിട്ട : പ്രായപൂര്‍ത്തിയാകാത്ത പെണ്‍കുട്ടിയെ ലൈംഗികമായി പീഡിപ്പിച്ച പ്രതിയെ മൂന്നു വര്‍ഷം കഠിനതടവിനും 50,000 രൂപ പിഴയും ശിക്ഷ വിധിച്ച്‌ അതിവേഗ സ്‌പെഷല്‍ കോടതി. ചാവക്കാട്‌ പുന്നയൂര്‍ക്കുളം അണ്ടത്തോട്‌ ചെറായി തേന്‍ പറമ്പില്‍ വീട്ടില്‍ ടി.എന്‍. പ്രവീണി(21)നെയാണ്‌ സ്‌പെഷ്യല്‍ കോടതി ജഡ്‌ജി ഡോണി തോമസ്‌ വര്‍ഗീസ്‌ ശിക്ഷിച്ചത്‌. പ്രോസിക്യൂഷന്‌ വേണ്ടി പബ്ലിക്‌ പ്രോസിക്യൂട്ടര്‍ അഡ്വ. റോഷന്‍ തോമസ്‌ ഹാജരായി. പിഴ അടച്ചില്ലെങ്കില്‍ മൂന്നു മാസത്തെ അധിക കഠിന തടവ്‌ കൂടി അനുഭവിക്കണം.
അന്വേഷണം പൂര്‍ത്തിയാക്കി ബലാല്‍സംഗത്തിനും പോക്‌സോ നിയമപ്രകാരവും കോടതിയില്‍ കുറ്റപത്രം സമര്‍പ്പിച്ചു.
കുട്ടിയുടെ ഫോണ്‍ കോണ്‍ടാക്‌ട് വിശദമായി പരിശോധിച്ച പോലീസ്‌ നിരവധി തവണ വിളിച്ച നമ്പര്‍ കണ്ടെത്തുകയും യുവാവിലേക്ക്‌ അന്വേഷണം എത്തി പിന്നീട്‌ അറസ്‌റ്റ് ചെയ്യുകയുമായിരുന്നു. 80 തവണ കുട്ടിയെ നിരന്തരം ഫോണില്‍ പ്രതി വിളിച്ചതായും നിരന്തരം പിന്തുടര്‍ന്ന്‌ ശല്യം ചെയ്‌തതായും വിചാരണയില്‍ തെളിഞ്ഞു. പോക്‌സോ നിയമത്തിലെ വകുപ്പുകള്‍ അനുസരിച്ച്‌ യുവാവ്‌ കുറ്റക്കാരനെന്ന്‌ വ്യക്‌തമായി. തുടര്‍ന്ന്‌ ശിക്ഷ വിധിക്കുകയായിരുന്നു. കോടതി നടപടികളില്‍ എ.എസ്‌.ഐ. ഹസീന പങ്കാളിയായി.
