പത്തനംതിട്ട : പത്തനംതിട്ട നഗരത്തിലെ ഗതാഗതക്കുരുക്ക് വര്ദ്ധിക്കുമ്പോഴും ഇത് പരിഹരിക്കാന് നടപടിയില്ല. നഗരത്തിലെ പ്രധാന ജംഗ്ഷനുകളില് ഒന്നായ ഗാന്ധി സ്ക്വയറിലാണ് ഏറ്റവും കൂടുതല് ഗതാഗതക്കുരുക്ക് അനുഭപ്പെടുന്നത്. മിനി സിവില് സ്റ്റേഷന് റോഡ്, ജനറല് ആശുപത്രി റോഡ്, കെ.എസ്.ആര്.റ്റിസി റോഡ്, പോസ്റ്റ് ഓഫീസ് റോഡ്, പോലീസ് സ്റ്റേഷന് എന്നിവടങ്ങളില് നിന്നെല്ലാം വാഹനങ്ങള് ഗാന്ധി സ്ക്വയറില് എത്തിയതിന് ശേഷമാണ് പലയിടങ്ങളിലേക്ക് തിരിഞ്ഞുപോകുന്നത്. എന്നാല് ദിവസവും നൂറുകണക്കിന് വാഹനങ്ങള് ഒന്നിച്ച് എത്തുമ്പോള് സ്ഥല പരിമിതിയില് വീര്പ്പുമുട്ടുന്ന ഗാന്ധി സ്ക്വയറില് ഗതാഗത കുരുക്കും വര്ദ്ധിക്കുകയാണ്.
വാഹനങ്ങള് ഒന്നിന് പുറകെ ഒന്നായി വരുമ്പോള് പെട്ടന്ന് ബ്രേക്ക് ചെയ്യുന്നതും ട്രാഫിക് തെറ്റിച്ച് വാഹനങ്ങള് പോകുന്നതും കാരണം വാഹനങ്ങള് തമ്മില് ഉരസുന്നതും ചെറിയ അപകടങ്ങള് നടക്കുന്നതും പലപ്പോഴും യാത്രക്കാര് തമ്മില് വാക്കേറ്റത്തിനും കാരണമായി തീരുന്നുണ്ട്. ഗാന്ധി സ്ക്വയറില് ട്രാഫിക് സിഗ്നല് സ്ഥാപിക്കാത്തതും ഗതാഗതക്കുരുക്ക് വര്ധിപ്പിക്കുന്നു. രാവിലെ ഒന്പത് മണി മുതല് തുടങ്ങുന്ന വാഹനത്തിരക്ക് ഉച്ചയോടെയാണ് ശാന്തമാവുക. പകല് സമയത്ത് ഗതാഗതം നിയന്ത്രിക്കാന് പോലീസും ഹോം ഗാര്ഡും ഉണ്ടെങ്കിലും ഇവരുടെ ഇടപെടല് കാര്യക്ഷമമല്ലെന്നും ആക്ഷേപമുണ്ട്.
