ചെങ്ങറ : കുരിശുംമൂട് ജംഗ്ഷൻ – പഴയ പോസ്റ്റോഫീസ് റോഡ് തകർന്ന് സഞ്ചാരയോഗ്യമല്ലാതായതോടെ പ്രതിഷേധവുമായി നാട്ടുകാർ രംഗത്ത്. ചെങ്ങറ കോ ഓപ്പറേറ്റീവ് ബാങ്കിന് മുൻപിലും മാർത്തോമ പള്ളിയുടെ മുൻഭാഗത്തും പൊട്ടിപ്പൊളിഞ്ഞ റോഡിൽ വെള്ളക്കെട്ടുകൾ രൂപം കൊണ്ടിട്ടുണ്ട്.
മഴ ശക്തമായതോടെ സ്ഥിതി കൂടുതൽ മോശമായിരിക്കുകയാണ്. ഒരു കിലോമീറ്റർ ദൂരമുള്ള ഈ പഞ്ചായത്ത് റോഡ് അടുത്തിടെ ജില്ലാ പഞ്ചായത്തിന്റെ ഫണ്ടുപയോഗിച്ചാണ് വീതികൂട്ടിയത് . ഈ റോഡിലൂടെ ബസ് സർവീസ് ഇല്ലാത്തതിനാൽ നാട്ടുകാർ കൂടുതലും ഒട്ടോറിക്ഷകളേയും ഇരുചക്രവാഹനങ്ങളേയുമാണ് ആശ്രയിക്കുന്നത്. കോ-ഓപ്പറേറ്റീവ് ബാങ്കിന് സമീപത്തെ റോഡിലെ വെള്ളക്കെട്ടിലെ ചെളിവെള്ളം സമീപത്തെ പഞ്ചായത്ത് കിണറ്റിലേക്കും ഒലിച്ചിറങ്ങിയതോടെ പഞ്ചായത്ത് കിണർ ഉപയോഗിക്കുന്ന പ്രദേശവാസികൾ വിഷമത്തിലായി. പൊട്ടിപ്പൊളിഞ്ഞ റോഡിന്റെ അറ്റകുറ്റപ്പണികൾ തീർത്ത് സഞ്ചാരയോഗ്യമാക്കണമെന്നാണ് നാട്ടുകാരുടെ ആവശ്യം.
