അടൂർ: പാമ്പുകൾ താവളമാക്കിയ കനാൽ അരികിലെ മുളംകാട് പരിസരവാസികൾക്ക് ഭീഷണിയാകുന്നു. പഴകുളം തെങ്ങുംതാരയിലെ പാസ് ജംങ്ഷനു സമീപം പത്ത് വീട്ടുകാരാണ് പാമ്പുകളെ ഭയന്ന് കഴിയുന്നത്. വർഷങ്ങൾക്കു മുമ്പ് പുറമ്പോക്കിൽ മണ്ണൊലിപ്പ് തടയുന്നതിന് വനം വകുപ്പ് നട്ടുപിടിപ്പിച്ചതാണ് മുളകൾ.
വർഷങ്ങൾ കഴിഞ്ഞപ്പോൾ മുളകൾ പൊട്ടി കിളിർത്ത്‌ ഇത് കാടായി. ഇവിടെനിന്ന്‌ സമീപത്തെ വീടുകളിലേക്ക് പാമ്പുകൾ കയറുന്ന അവസ്ഥയാണ്. പകലും പാമ്പുകൾ മുളംകാട്ടിൽനിന്ന്‌ പുറത്തിറങ്ങി തുടങ്ങി. പഴകുളം കോലമലയിലേക്ക് പോകുന്ന കാൽനടക്കാർക്കും മുളംകാട് ഭീഷണിയാണ്. ഇതിന് പരിഹാരം കാണണം എന്നാവശ്യപ്പെട്ട് കല്ലട ഇറിഗേഷൻ പ്രോജക്ട് ജലവിതരണ സംരക്ഷണ വിഭാഗത്തിന്റെ അടൂർ സബ് ഡിവിഷൻ അധികൃതർക്ക് പരാതി നൽകിയിരുന്നു. അധികൃതർ സ്ഥലത്തെത്തിയെങ്കിലും നടിപടിയൊന്നും സ്വീകരിച്ചില്ലെന്ന് നാട്ടുകാർ പറയുന്നു.
