തിരുവനന്തപുരം: വൈദ്യുതി ബോര്‍ഡിന്റെ പെന്‍ഷന്‍ ബാധ്യത ഏറ്റെടുക്കാനാവില്ലെന്നും പെന്‍ഷന്‍ മാസ്റ്റര്‍ ട്രസ്റ്റിലേക്ക് തുക വകയിരുത്തേണ്ട ഉത്തരവാദിത്വം വൈദ്യുതി ബോര്‍ഡിനാണെന്നും വ്യക്തമാക്കി സര്‍ക്കാര്‍ ഉത്തരവിറക്കി. ഉപഭോക്താക്കളില്‍നിന്നു പിരിക്കുന്ന വൈദ്യുതി ഡ്യൂട്ടി, ബോര്‍ഡിനു വിട്ടുനല്‍കാനാവില്ലെന്ന് ചൂണ്ടിക്കാട്ടിയ ഉത്തരവില്‍ കെ.എസ്.ഇ.ബി. ലിമിറ്റഡ് വാര്‍ഷികവിഹിതം മാസ്റ്റര്‍ ട്രസ്റ്റിനു നല്‍കിയാണ് പെന്‍ഷന്‍ ഫണ്ട് നിലനിര്‍ത്തേണ്ടതെന്നും വിശദീകരിക്കുന്നു. ഹൈക്കോടതി ആവശ്യപ്പെട്ടതിനെത്തുടര്‍ന്നാണ് ബോര്‍ഡിലെ പെന്‍ഷന്‍കാരുടെ സംഘടനയായ പെന്‍ഷന്‍ കൂട്ടായ്മ പ്രതിനിധികളെ കേട്ടശേഷം സര്‍ക്കാര്‍ ഉത്തരവിറക്കിയത്.
പത്തുവര്‍ഷത്തേക്കുകൂടി വൈദ്യുതി ഡ്യൂട്ടി, ബോര്‍ഡിനു നല്‍കണമെന്നും മാസ്റ്റര്‍ ട്രസ്റ്റ് പ്രവര്‍ത്തനസജ്ജമാക്കാന്‍ സര്‍ക്കാര്‍ ഇടപെടണമെന്നും ആവശ്യപ്പെട്ടാണ് പെന്‍ഷന്‍ കൂട്ടായ്മ ഹൈക്കോടതിയെ സമീപിച്ചത്. പെന്‍ഷന്‍ കൂട്ടായ്മ പ്രതിനിധികളെ നേരിട്ടുകേട്ടശേഷം ഇതുസംബന്ധിച്ച് നടപടികള്‍ കൈക്കൊള്ളാന്‍ കോടതി ആവശ്യപ്പെട്ടപ്രകാരമാണ് ഊര്‍ജവകുപ്പ് ഇപ്പോള്‍ ഉത്തരവിറക്കിയത്. 2013-ലെ ത്രികക്ഷി കരാര്‍പ്രകാരം പെന്‍ഷന്‍ ഫണ്ടിന്റെ 35.4 ശതമാനം ബാധ്യത സംസ്ഥാന സര്‍ക്കാരിനാണ്. ഇതിന്റെ അടിസ്ഥാനത്തില്‍ ഉപഭോക്താക്കളില്‍നിന്ന് ഡ്യൂട്ടി ഇനത്തില്‍ പിരിക്കുന്ന തുക പത്തുവര്‍ഷത്തേക്ക് സര്‍ക്കാര്‍ ബോര്‍ഡിന് വിട്ടുനല്‍കിയിരുന്നു.
