കണ്ണൂര്‍ : രണ്ടാം പിണറായി സര്‍ക്കാറിന്റെ ഒന്നാം വാര്‍ഷികാഘോഷത്തിന്റെ സംസ്ഥാനതല ഉദ്ഘാടനം ഏപ്രില്‍ മൂന്നിന് വൈകീട്ട് ആറിന് കണ്ണൂര്‍ പോലീസ് മൈതാനിയില്‍ മുഖ്യമന്ത്രി പിണറായി വിജയന്‍ നിര്‍വഹിക്കും. മൂന്നുമുതല്‍ 14 വരെ പോലീസ് മൈതാനിയില്‍ നടക്കുന്ന ‘എന്റെ കേരളം’ മെഗാ എക്‌സിബിഷനും മുഖ്യമന്ത്രി ഉദ്ഘാടനം ചെയ്യും. റവന്യൂ മന്ത്രി അഡ്വ. കെ. രാജന്‍ അധ്യക്ഷത വഹിക്കും. തുടര്‍ന്ന് വിവിധ കലാപരിപാടികള്‍ അരങ്ങേറും. സംസ്ഥാനത്തെ എല്ലാ ജില്ലകളിലും നടക്കുന്ന പ്രദര്‍ശന വിപണന മേളകള്‍ക്കാണ് കണ്ണൂരില്‍ തുടക്കമാവുക. എല്ലാ ദിവസവും കലാ സാംസ്‌കാരിക സന്ധ്യയും അരങ്ങേറും.
