തിരുവനന്തപുരം: മത്സ്യത്തൊഴിലാളികള്ക്കൊപ്പം ഏത് പ്രശ്നത്തിലും സര്ക്കാറുണ്ടെന്ന് മുഖ്യമന്ത്രി പിണറായി വിജയന്. ഒട്ടേറെ പ്രശ്നങ്ങള് നേരിടുന്നവരാണ് മത്സ്യത്തൊഴിലാളികള്,അതിലെല്ലാം ഫലപ്രദമായ നടപടികളാണ് സര്ക്കാര് സ്വീകരിച്ചിട്ടുള്ളത്. മത്സ്യബന്ധന മേഖലയെ എല്ലാ ഘട്ടത്തിലും സവിശേഷമായ പ്രാധാന്യത്തോടെയാണ് സര്ക്കാര് കണ്ടിട്ടുള്ളത്. തിരുവനന്തപുരത്ത് നടന്ന തീരസദസ് സംസ്ഥാനതല ഉദ്ഘാടനവേദിയിലാണ് മുഖ്യമന്ത്രി ഇക്കാര്യം വ്യക്തമാക്കിയത്.
മത്സ്യബന്ധനമേഖല കേരളത്തില് പ്രധാനപ്പെട്ടതാണ്. ഈ തൊഴില് ഉപജീവനം മാത്രമല്ല ജനങ്ങള്ക്ക് നല്ല മത്സ്യവും ഇതിലൂടെ പോഷകാഹാരവും ലഭ്യമാക്കുന്നതാണെന്നും മത്സ്യത്തൊഴിലാളികളുടെ ക്ഷേമം മുന്നിര്ത്തികൊണ്ടുള്ള പ്രവര്ത്തനം സര്ക്കാരിന്റെ ഏറ്റവും വലിയ ഉത്തരവാദിത്വമാണെന്നും മുഖ്യമന്ത്രി വ്യക്തമാക്കി. വെറും ചര്ച്ചാ വേദി മാത്രമല്ല തീരസദസ് അതൊരു പരിഹാരവേദി കൂടിയാണ്. തീരുമാനം കാത്തുകിടക്കുന്ന ഒട്ടേറെ പ്രശ്നങ്ങള് വിവിധ ഓഫീസുകളിലുണ്ട്, അതിവേഗം ഈ പ്രശ്നങ്ങള്ക്ക് പരിഹാരം കാണാനുള്ള നടപടികളാണ് സര്ക്കാര് സ്വീകരിക്കുന്നത് മുഖ്യമന്ത്രി പറഞ്ഞു.
