തിരുവനന്തപുരം: വിമാന ടിക്കറ്റ് നിരക്കുകള് കുത്തനെ കൂട്ടിയ സാഹചര്യത്തില്, വിമാനക്കമ്പനികളുടെ നീക്കത്തിനെതിരെ നടപടി എടുക്കണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയന് പ്രധാനമന്ത്രിക്ക് കത്തയച്ചു. നിരക്ക് വര്ദ്ധനവ് പരിഗണിച്ച് വിഷു, ഈസ്റ്റര്, റമദാന് എന്നിവയുടെ പശ്ചാത്തലത്തില് സംസ്ഥാന സര്ക്കാര് ചാര്ട്ടേഡ് വിമാനങ്ങളുടെ പ്രത്യേക സര്വീസ് നടത്താന് തീരുമാനിച്ചു. ഇതിനായി കേന്ദ്രം അനുമതി നല്കണമെന്നും കത്തില് ആവശ്യപ്പെട്ടിട്ടുണ്ട്.
ഗള്ഫ് രാജ്യങ്ങളില് നിന്നുള്ള ടിക്കറ്റ് നിരക്കില് വലിയ വര്ദ്ധനവാണ് ഉണ്ടായിട്ടുള്ളത്. കഴിഞ്ഞ രണ്ടുമാസത്തിനിടെ മൂന്ന് മടങ്ങ് വര്ദ്ധനവാണ് ടിക്കറ്റ് നിരക്കില് എയര്ലൈന് കമ്പനികള് വരുത്തിയത്. പ്രവാസികളടക്കമുള്ളവര്ക്ക് ഈ നിരക്ക് ബുദ്ധിമുട്ടാകും. നിരക്കുകള് മിതപ്പെടുത്തണമെന്ന സംസ്ഥാന സര്ക്കാരിന്റെ ആവശ്യത്തില് അനുകൂല നിലപാട് വിമാന കമ്പനികള് സ്വീകരിച്ചില്ലെന്നും, വിഷയത്തില് കേന്ദ്രസര്ക്കാര് അടിയന്തരമായി ഇടപെടണമെന്നും കത്തില് ആവശ്യപ്പെടുന്നു.
