ന്യൂഡല്ഹി: ദീപാവലിക്ക് ആക്രമണം നടത്താന് പദ്ധതിയിട്ടിരുന്നതായി നിര്ണായക വെളിപ്പെടുത്തല് നടത്തി ഡല്ഹി സ്ഫോടനക്കേസിലെ പ്രതികള്. ഒമ്പത് പേരുടെ മരണത്തിനിടയാക്കിയ സ്ഫോടനത്തിന് മുമ്പ് താനും ഡോ. ഉമര് നബിയും ചെങ്കോട്ടയില് നിരീക്ഷണം നടത്തിയിരുന്നതായി പ്രധാന പ്രതിയായ മുസമ്മില് ഷക്കീല് അന്വേഷണ ഉദ്യോഗസ്ഥരോട് പറഞ്ഞതായാണ് പുറത്തുവരുന്ന വിവരം. മുസമ്മിലിന്റെ ഫോണില് നിന്ന് വീണ്ടെടുത്ത വിവരങ്ങള് നിരത്തിയാണ് അദ്ദേഹത്തെ ചോദ്യം ചെയ്യുന്നത്.
അടുത്ത വര്ഷം ജനുവരി 26ന് ആക്രമണം നടത്താന് പദ്ധതിയിട്ടിരുന്നതായും ഇതിന്റെ ഭാഗമായാണ് ചെങ്കോട്ടയ്ക്ക് സമീപം നിരീക്ഷണം നടത്തിയതെന്നും ചോദ്യം ചെയ്യലില് മുസമ്മില് പറഞ്ഞു. ഈ ദീപാവലിക്ക് തിരക്കേറിയ സ്ഥലത്ത് ആക്രമണം നടത്താന് പദ്ധതിയിട്ടിരുന്നുവെന്നും എന്നാല് അത് നടപ്പിലാക്കാന് കഴിഞ്ഞില്ലെന്നും മുസമ്മില് പോലീസിനോട് പറഞ്ഞതായും വിവരമുണ്ട്.
