ന്യൂഡല്‍ഹി: അതിര്‍ത്തിയിലെ സംഘര്‍ഷം ചര്‍ച്ച ചെയ്യാന്‍ പ്രധാനമന്ത്രി നരേന്ദ്ര മോദി വിളിച്ച സര്‍വകക്ഷി യോഗം ഇന്ന്. വൈകിട്ട് അഞ്ചിന് നടക്കുന്ന യോഗത്തില്‍ സോണിയ ഗാന്ധി, മമത ബാനര്‍ജി, ശരദ് പവാര്‍, നിതീഷ് കുമാര്‍, സീതാറാം യെച്ചൂരി, എം.കെ. സ്റ്റാലിന്‍, ജഗന്‍മോഹന്‍ റെഡ്ഡി, ഡി.രാജ തുടങ്ങിയവര്‍ പങ്കെടുക്കും.
കോവിഡിന്റെ പശ്ചാത്തലത്തില്‍ വീഡിയോ കോണ്‍ഫറന്‍സ് വഴിയാണ് യോഗം ചേരുക. തിങ്കളാഴ്ച ഗാല്‍വന്‍വാലി അതിര്‍ത്തിയിലുണ്ടായ സംഘര്‍ഷത്തെക്കുറിച്ചുള്ള വിശദാംശങ്ങള്‍ രാഷ്ട്രീയ പാര്‍ട്ടികളെ അറിയിക്കും. സേന ഉദ്യോഗസ്ഥര്‍ ഇക്കാര്യം വിശദീകരിക്കും. പ്രശ്നപരിഹാരത്തിന് നടക്കുന്ന ചര്‍ച്ചകളേക്കുറിച്ചും യോഗത്തെ അറിയിക്കും.
അതേസമയം ഇന്നലെ മേജര്‍ ജനറല്‍ തലത്തില്‍ നടന്ന ചര്‍ച്ചയിലും പ്രശ്നപരിഹാരമായില്ല. നയതന്ത്രതലത്തില്‍ ഇരുരാജ്യങ്ങളും ചര്‍ച്ച തുടരും. അതിനിടെ ചൈന അതിര്‍ത്തിയില്‍ ബുള്‍ഡോസറുകള്‍ എത്തിച്ച്‌ നിര്‍മ്മാണപ്രവര്‍ത്തനം തുടരുന്നതായി റിപ്പോര്‍ട്ടുകളുണ്ട്.
