റാന്നി : പുനലൂർ – മൂവാറ്റുപുഴ സംസ്ഥാന പാതയുടെ നിർമ്മാണത്തിന് നിലവാരം ഇല്ലെന്ന് പരാതി. ഓടകള്ക്ക് മുകളില് മൂടിയായി ഇടുന്ന കോണ്ക്രീറ്റ് സ്ലാബുകള് തീര്ത്തും ബലക്ഷയമെന്നും വാഹനം കയറുമ്പോള് സ്ലാബുകള് തകരുന്നതായും ആക്ഷേപമുണ്ട്.
റാന്നി പെരുമ്പുഴ ബസ് സ്റ്റാന്റിലേക്ക് റോഡിൽ നിന്നുകയറുന്ന ഭാഗത്തെ ഓടയുടെ സ്ലാബുകള് ബസ് കയറിയതിനെ തുടർന്ന് കഴിഞ്ഞദിവസം ഒടിഞ്ഞു തകർന്നിരുന്നു. നിലവാരം കുറഞ്ഞ നിര്മ്മാണ സാമഗ്രികളാണ് റോഡുപണിക്ക് ഉപയോഗിക്കുന്നതെന്നുള്ള ആക്ഷേപവുമായി നാട്ടുകാർ രംഗത്ത് വന്നിരുന്നു. കോടികള് ചെലവഴിച്ച് ഉന്നത നിലവാരത്തില് പണിയുന്ന റോഡ്, പണി പൂര്ത്തിയാകുന്നതിന് മുമ്പ് തകരുന്നത് ഗുരുതരമാണെന്നും നിലവാരമില്ലാത്ത ഉല്പ്പന്നങ്ങള് ഇനിയും ഉപയോഗിച്ചാല് പ്രത്യക്ഷ സമരവുമായി രംഗത്തിറങ്ങുമെന്നും നാട്ടുകാര് മുന്നറിയിപ്പു നല്കിയിരുന്നു. സംഭവം വിവാദമായതിനെ തുടർന്ന് ഒടിഞ്ഞ സ്ലാബുകൾ മാറ്റി പുതിയത് സ്ഥാപിച്ചു.
