മലപ്പുറം: നിലമ്പൂര്‍ എം.എല്‍.എ പി.വി. അന്‍വറിനെ യു.ഡി.എഫ് പ്രവര്‍ത്തകര്‍ കൈയേറ്റം ചെയ്തതായി പരാതി. വെള്ളിയാഴ്ച രാത്രി 11ഓടെ മുണ്ടേരി കോളനിയിലെത്തിയ എം.എല്‍.എയെ യു.ഡി.എഫ് പ്രവര്‍ത്തകര്‍ തടയുകയായിരുന്നു. എന്നാല്‍ തനിക്കെതിരെ നടന്നത് വധശ്രമമാണെന്ന് എം.എല്‍.എ ആരോപിച്ചു. സംഭവത്തില്‍ പ്രതിഷേധിച്ച്‌ എല്‍.ഡി.എഫ് പ്രവര്‍ത്തകര്‍ മുന്‍ മന്ത്രിയും കോണ്‍ഗ്രസ് നേതാവുമായ ആര്യാടന്‍ മുഹമ്മദിന്റെ വീട്ടിലേക്ക് മാര്‍ച്ച്‌ നടത്തി.
രണ്ടിടത്ത് വെച്ച്‌ അക്രമികള്‍ തടഞ്ഞെന്നും 15ഓളം ബൈക്കുകളിലായാണ് 30 പേര്‍ അടങ്ങുന്ന സംഘം എത്തിയതെന്നും അവരുടെ കൈയില്‍ ആയുധങ്ങളുണ്ടായിരുന്നുവെന്നും എം.എല്‍.എ പറയുന്നു. രാത്രി എന്തിന് വന്നു, ഈ സമയത്ത് ഇവിടെ കണ്ടാല്‍ കൊന്നുകളയുമെന്നൊക്കെയായിരുന്നു ഭീഷണിയെന്നും എം.എല്‍.എ പറഞ്ഞു. തന്റെ കാറു തടഞ്ഞ അക്രമിസംഘം വണ്ടിയില്‍ നിന്ന് പിടിച്ചിറക്കാന്‍ ശ്രമിച്ചു. ഗണ്‍മാന്‍ അവരെ തടയാന്‍ ശ്രമിച്ചു. അതോടെ മര്‍ദ്ദനം അദ്ദേഹത്തിന് നേരെയായി. അദ്ദേഹത്തിന് പരിക്കേറ്റിട്ടുണ്ടെന്നും എം.എല്‍.എ പറഞ്ഞു.
എം.എല്‍.എ അര്‍ധരാത്രി കോളനിയിലെത്തിയത് ദുരുദ്ദേശ്യത്തോടെയാണെന്നാണ് യു.ഡി.എഫ് പ്രവര്‍ത്തകരുടെ ആരോപണം. ആദ്യം രണ്ടുപേര്‍ ബൈക്ക് കുറുകെയിട്ട് എം.എല്‍.എയുടെ വാഹനം തടയുകയായിരുന്നു. പിന്നീടാണ് കൂടുതല്‍ യു.ഡി.എഫ് പ്രവര്‍ത്തകര്‍ സ്ഥലത്തെത്തുകയും എം.എല്‍.എക്ക് നേരെ കൈയേറ്റ ശ്രമമുണ്ടാകുകയും ചെയ്യുന്നത്. തെരഞ്ഞെടുപ്പുമായി ബന്ധപ്പെട്ട ഒരു കുടുംബയോഗത്തില്‍ പങ്കെടുക്കാനാണ് താന്‍ അവിടെ എത്തിയതെന്നും അതുകഴിഞ്ഞ് വരുംവഴി മുണ്ടേരി കോളനിയിലെ രോഗിയായ ഒരാളെ സന്ദര്‍ശിക്കാനാണ് അവിടെ പോയതെന്നും എം.എല്‍.എ പറഞ്ഞു.
സംഭവം അറിഞ്ഞതോടെ എല്‍.ഡി.എഫ് പ്രവര്‍ത്തകര്‍ സ്ഥലത്തെത്തുകയും സംഘര്‍ഷമുണ്ടാകുകയും ചെയ്തു. പിന്നീട് ഇവര്‍ സംഘടിച്ച്‌ ആര്യാടന്‍ മുഹമ്മദിന്റെ വീട്ടിലേക്ക് മാര്‍ച്ച്‌ നടത്തി. എം.എല്‍.എയുടെ പരാതിയെ തുടര്‍ന്ന് വാഹനം തടഞ്ഞയാളെ പോലീസ് അറസ്റ്റ് ചെയ്തിരുന്നു. ഇയാളെ വിട്ടയക്കണമെന്ന് ആവശ്യപ്പെട്ട് പ്രതിഷേധവുമായി യു.ഡി.എഫ് പ്രവര്‍ത്തകര്‍ പോത്തുകല്‍ പോലീസ് സ്റ്റേഷനിലെത്തി.
