തിരുവനന്തപുരം : ചോദ്യപേപ്പറിന് പകരം കേരള സര്വകലാശാല വിദ്യാര്ഥികള്ക്ക് ഉത്തരസൂചിക നല്കിയതായി പരാതി. ബിഎസ്സി ഇലക്ട്രോണിക്സ് നാലാം സെമസ്റ്റര് പരീക്ഷയിലാണ് ഈ വീഴ്ച. മൂല്യനിര്ണയത്തിന് ഉത്തരക്കടലാസ് എത്തിയപ്പോഴാണ് വീഴ്ചയെ കുറിച്ച് സര്വകലാശാല അറിയുന്നത്. അവിശ്വസനീയമെന്ന് തോന്നാവുന്ന വീഴ്ചയാണ് പരീക്ഷാ നടത്തിപ്പില് സര്വകലാശാലക്ക് ഉണ്ടായിരിക്കുന്നത്. ബിഎസ്സി ഇലക്ട്രോണിക്സ് നാലാം സെമസ്റ്റര് വിദ്യാര്ഥികള്ക്കായി സിഗ്നല് ആന്ഡ് സിസ്റ്റംസ് എന്ന വിഷയത്തിലായിരുന്നു പരീക്ഷ. കോവിഡ് കാലമായതിനാലാണ് പ്രത്യേക പരീക്ഷ ക്രമീകരിച്ചത്.
കഴിഞ്ഞ ഫെബ്രുവരിയിലാണ് പരീക്ഷ നടന്നത്. ഒന്നിലധികം പേര് രജിസ്റ്റര് ചെയ്തിരുന്നുവെങ്കിലും കൊല്ലം ജില്ലയിലെ ഒരു വിദ്യാര്ഥി മാത്രമാണ് പരീക്ഷ എഴുതിയത്. ചോദ്യപേപ്പറിന് പകരം ആന്സര് കീയാണ് അച്ചടിച്ച് വിദ്യാര്ഥികള്ക്ക് നല്കിയത്. അത് ഉത്തരക്കടലാസില് വിദ്യാര്ഥി അതേപോലെ തന്നെ പകര്ത്തി എഴുതുകയും ചെയ്തു. ഉത്തരക്കടലാസ് സര്വകലാശാല മൂല്യനിര്ണയത്തിന് നല്കി. ചോദ്യപേപ്പര് എവിടെ എന്ന് മൂല്യനിര്ണയത്തില് ചുമതലയുള്ള അധ്യാപകന് ചോദിച്ചപ്പോഴാണ് ആന്സര് കീയാണ് പകരം നല്കിയതെന്ന വിവരം സര്വകലാശാല അറിയുന്നത്. ഇനി എന്ത് ചെയ്യണമെന്ന് അറിയാതെ കുഴങ്ങിയിരിക്കുകയാണ് സര്വകലാശാല.
