കണ്ണൂര് : യൂണിവേഴ്സിറ്റി വൈസ് ചാന്സിലര് പുനര് നിയമനത്തിന് ശുപാര്ശ ചെയ്തത് ഉന്നത വിദ്യാഭ്യാസ മന്ത്രി ആര് ബിന്ദു എന്നതിന് തെളിവ് പുറത്ത്. മന്ത്രി അയച്ച കത്ത് പുറത്തു വന്നു. ഇതു സംബന്ധിച്ച് ഗവര്ണ്ണര്ക്കാണ് പ്രൊഫ. ബിന്ദു കത്ത് നല്കിയത്. കണ്ണൂര് വിസി പുനര് നിയമനത്തിന് ഗവര്ണ്ണറോട് ആവശ്യപ്പെട്ടത് മന്ത്രിയാണെന്ന് പ്രതിപക്ഷം ആവര്ത്തിക്കുമ്പോഴും മന്ത്രി മൗനം തുടരുന്നതിനിടെയാണ് ഇപ്പോള് കത്ത് പുറത്തു വന്നിരിക്കുന്നത്.
വിരമിച്ച ദിവസം കണ്ണൂര് വിസി ഗോപിനാഥ് രവീന്ദ്രനെ തന്നെ നിയമനം നല്കാന് ആര് ഗവര്ണ്ണര്ക്ക് ശുപാര്ശ നല്കി എന്നതില് സര്ക്കാര് ഉരുണ്ടുകളി തുടരുകയാണ്. സര്ക്കാര് ശുപാര്ശ നല്കിയിട്ടില്ലെന്നാണ് സേവ് യൂണിവേഴ്സിറ്റി ക്യാമ്പയിന് കമ്മിറ്റിക്ക് കിട്ടിയ മറുപടി. വിവരാവകാശ നിയമപ്രകാരമുള്ള തുടര് അപേക്ഷകളില് രാജ്ഭവന്റെയും സര്ക്കാറിന്റെയും മറുപടി കാത്തിരിക്കെ സംശയമുന നീളുന്നത് ഉന്നത വിദ്യാഭ്യാസമന്ത്രിയിലേക്ക് തന്നെയായിരുന്നു. സര്ക്കാര് നിലപാട് ഉന്നത വിദ്യാഭ്യാസ സെക്രട്ടറി അറിയിക്കുന്നതിന് പകരം മന്ത്രി തന്നെ വിസി നിയമനത്തിന് കത്ത് നല്കി എന്ന ആക്ഷേപം തുടര്ച്ചയായി പ്രതിപക്ഷം ഉയര്ത്തുന്നു.
