കൊച്ചി : നടിയെ ആക്രമിച്ച കേസില്‍ വെളിപ്പെടുത്തല്‍ നടത്തിയ മുന്‍ ജയില്‍ ഡിജിപി ആര്‍.ശ്രീലേഖക്കെതിരെ കേസെടുക്കുന്നത് സംബന്ധിച്ച്‌ നിയമോപദേശം തേടി പോലീസ്. ശ്രീലേഖയുടെ വിവാദ യൂട്യൂബ് വീഡിയോ പോലീസ് പരിശോധിച്ചു. വീഡിയോയില്‍ കോടതിയലക്ഷ്യ പരാമര്‍ശങ്ങള്‍ ഇല്ലെന്നാണ് പ്രാഥമിക വിലയിരുത്തല്‍.
പള്‍സര്‍ സുനിയെക്കുറിച്ചുള്ള പരാമര്‍ശം ഗൗരവമേറിയതാണെന്ന് പോലീസ് വിലയിരുത്തി. പള്‍സര്‍ സുനി സിനിമാ മേഖലയിലെ നിരവധി സ്ത്രീകളെ ലൈംഗീകമായി പീഡിപ്പിച്ച്‌ ബ്ലാക്ക് മെയില്‍ ചെയ്ത് പണം തട്ടിയത് അറിയാമെന്ന പരാമര്‍ശം ഗൗരവമുള്ളതാണ്. ഉന്നത പദവിയിലിരുന്ന ഒരാള്‍ക്ക് നേരിട്ട് ഇക്കാര്യങ്ങളെ കുറിച്ച്‌ അറിവുണ്ടായിട്ടും നിയമ നടപടികള്‍ സ്വീകരിക്കാതിരുന്നത് ഗുരുതര പിഴവാണെന്നും പോലീസ് ചൂണ്ടിക്കാട്ടി. പരാതിക്കാര്‍ കോടതിയെ സമീപിച്ചാലും കേസെടുക്കാന്‍ ഉത്തരവിട്ടേക്കുമെന്ന് പോലീസ് വിലയിരുത്തി. ഇക്കാര്യത്തിലാണ് പോലീസ് നിയമോപദേശം തേടുന്നത്. പ്രൊഫ.കുസുമം ജോസഫ് നല്‍കിയ പരാതിയിലാണ് തൃശൂര്‍ റൂറല്‍ പോലീസ് നടപടി.
