ദില്ലി: ലോക്സഭയില് നിന്ന് അയോഗ്യനാക്കപ്പെട്ട രാഹുല് ഗാന്ധിയോട് വീടൊഴിയാന് ആവശ്യപ്പെട്ടു. അയോഗ്യനാക്കപ്പെട്ടതോടെ രാഹുല് ഗാന്ധിക്ക് കിട്ടിയിരുന്ന എല്ലാ ആനുകൂല്യങ്ങളും നഷ്ടമാകുമെന്ന് നേരത്തെ തന്നെ ലോക്സഭാ സെക്രട്ടേറിയേറ്റ് വ്യക്തമാക്കിയിരുന്നു. ലോക്സഭ ഹൗസിംഗ് കമ്മിറ്റിയാണ് നോട്ടീസ് നല്കിയിരിക്കുന്നത്. ഒരു മാസത്തിനുള്ളില് വീടൊഴിയണമെന്നാണ് നിര്ദ്ദേശം.
അതേസമയം ദില്ലിയില് രാഹുല് ഗാന്ധിയുടെ അയോഗ്യതയ്ക്കെതിരെ യൂത്ത് കോണ്ഗ്രസ് നടത്തിയ പ്രതിഷേധ മാര്ച്ചില് സംഘര്ഷം. ജന്തര്മന്ദറില് മാര്ച്ച് തടഞ്ഞ പോലീസ്, പ്രവര്ത്തകരെ അറസ്റ്റ് ചെയ്ത് നീക്കി. ഷാഫി പറമ്പിലിനെയും ശ്രീനിവാസിനെയും അറസ്റ്റ് ചെയ്തു. മുഴുവന് പ്രതിഷേധകരെയും അറസ്റ്റ് ചെയ്ത് നീക്കുന്നത് വരെ പ്രതിഷേധം തുടരുമെന്നാണ് പ്രവര്ത്തകര് അറിയിച്ചിരിക്കുന്നത്.
