പത്തനംതിട്ട ; മറുനാടന്‍ മലയാളി ഓണ്‍ലൈന്‍ ചാനലുമായി ബന്ധപ്പെട്ട മാനനഷ്ട കേസില്‍ കേരള പത്രപ്രവര്‍ത്തക യൂനിയന്‍ പത്തനംതിട്ട ജില്ലാ എക്‌സിക്യൂട്ടീവ് കമ്മിറ്റിയംഗവും മംഗളം ദിനപത്രം ലേഖകനുമായ ജി വിശാഖന്റെ വീട്ടില്‍ പോലീസ് റെയിഡ്. മൊബൈല്‍ ഫോണ്‍ അടക്കം പിടിച്ചെടുത്തു. ഇന്നലെ രാവിലെ പത്തോടെയാണ് വിശാഖന്റെ വീട്ടില്‍ പോലീസ് റെയിഡ് നടത്തിയത്. മറുനാടന്‍ മലയാളി ഉടമ ഷാജന്‍ സ്‌കറിയയുമായി വിശാഖന് ബന്ധമുണ്ടെന്ന് ആരോപിച്ചായിരുന്നു നടപടി. എന്നാല്‍, ഇതിനെതിരെ രൂക്ഷവിമര്‍ശനവുമായി കേരള പത്രപ്രവര്‍ത്തക യൂനിയന്‍ ജില്ലാ കമ്മിറ്റി രംഗത്തെത്തി.
വാര്‍ത്തയുടെ ഉറവിടം തേടിയുള്ള അന്വേഷണത്തിന്റെ ഭാഗമായി പോലിസ് നടത്തുന്ന ഇത്തരം കിരാത നടപടികളെ ജനാധിപത്യ സമൂഹം ഒറ്റക്കെട്ടായി എതിര്‍ക്കണമെന്ന് ജില്ലാ കമ്മിറ്റി ആവശ്യപ്പെട്ടു. മറുനാടന്‍ മലയാളി ഓണ്‍ലൈന്‍ ചാനലുമായി ബന്ധപ്പെട്ട മാനനഷ്ട കേസില്‍ റെയ്ഡും നടപടികളും മറ്റുമായി മാധ്യമ പ്രവര്‍ത്തകര്‍ സംസ്ഥാനത്താകമാനം പീഡനങ്ങള്‍ക്കു വിധേയമായി വരികയാണ്. വാര്‍ത്ത എഴുതിയതിന്റെ പേരില്‍ മാധ്യമപ്രവര്‍ത്തകരെ കള്ളക്കേസില്‍ കുടുക്കി വേട്ടയാടാന്‍ പോലിസ് കാട്ടുന്ന ആവേശത്തിനു പിന്നില്‍ ഭരണകൂട ഭീകരതയാണ് പ്രകടമാകുന്നതെന്ന് യൂനിയന്‍ ജില്ലാ പ്രസിഡന്റ് സജിത് പരമേശ്വരനും സെക്രട്ടറി എ ബിജുവും അഭിപ്രായപ്പെട്ടു.
