തിരുവനന്തപുരം: സംസ്ഥാനത്ത് ചരിത്രത്തിലെ ഏറ്റവും കുറവ് മഴ ലഭിച്ച ഓഗസ്റ്റിന് ശേഷം സെപ്റ്റംബറില്‍ ചെറുതായി മഴ വര്‍ധിച്ചു. സെപ്റ്റംബര്‍ മാസത്തില്‍ ശരാശരി ലഭിക്കേണ്ട മഴ 272 മില്ലിമീറ്റര്‍ ആണ്. ആദ്യ 10 ദിവസത്തെ കണക്കെടുത്താല്‍ 154 മി.മീ മഴ ലഭിച്ചിട്ടുണ്ട്. അതായത് ഈ മാസം ലഭിക്കേണ്ടതിന്റെ 57 ശതമാനം മഴ ലഭിച്ചിട്ടുണ്ട്. ഓഗസ്റ്റ് മാസം മുഴുവന്‍ ലഭിച്ചത് 60 മി.മീ മഴ മാത്രമാണ്. സെപ്റ്റംബര്‍ 10 വരെയുള്ള കണക്കനുസരിച്ച് ഏറ്റവും കൂടുതല്‍ മഴ ലഭിച്ചത് പത്തനംതിട്ട ജില്ലയിലാണ്. 261 മി.മീ മഴ. ഈ മാസം ആകെ ലഭിക്കേണ്ട മഴയെക്കാള്‍ (251mm) 4% കൂടുതല്‍ ലഭിച്ചു കഴിഞ്ഞു.
പത്തനംതിട്ട, എറണാകുളം, കോഴിക്കോട്, ആലപ്പുഴ ജില്ലകളിലും കൂടുതല്‍ മഴ ലഭിച്ചിട്ടുണ്ട്. അതേസമയം, ജൂണ്‍ മുതല്‍ ഇതുവരെയുള്ള കണക്കെടുത്താല്‍ ഏറ്റവും കൂടുതല്‍ മഴ ലഭിച്ചത് കാസര്‍കോട്, കണ്ണൂര്‍, എറണാകുളം, കോഴിക്കോട് ജില്ലകളിലാണ്. അതേസമയം ചൊവ്വാഴ്ചയോടെ വടക്ക് പടിഞ്ഞാറന്‍ ബംഗാള്‍ ഉള്‍ക്കടലില്‍ പുതിയ ചക്രവാതച്ചുഴി രൂപപ്പെടാന്‍ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചിട്ടുണ്ട്.
