തിരുവനന്തപുരം: പത്താം ക്ലാസ് പരീക്ഷയില് എല്ലാ വിഷയങ്ങള്ക്കും എ പ്ലസ് നേടിയ വിദ്യാര്ത്ഥിനി രാഖിശ്രീയെ തൂങ്ങിമരിച്ച നിലയില് കണ്ടെത്തിയ സംഭവത്തില് യുവാവിനെതിരെ പോലീസ് പോക്സോ കുറ്റം ചുമത്തി കേസെടുത്തു. വീട്ടുകാരുടെ ആരോപണത്തിന് പിന്നാലെ ചിറയിന്കീഴ് പോലീസ് നടത്തിയ അന്വേഷണത്തില് രാഖിശ്രീയുടെ സുഹൃത്തായിരുന്ന അര്ജുനെതിരെ തെളിവ് ലഭിച്ചിരുന്നു. ഇതിന് പിന്നാലെയാണ് യുവാവിനെതിരെ പോക്സോ, ആത്മഹത്യ പ്രേരണ കുറ്റങ്ങള് ചമുത്തി പോലീസ് കേസെടുത്തത്. കഴിഞ്ഞ മാസം 20ന് ആറു മണിയ്ക്കാണ് പതിനാറ് വയസുകാരിയായ രാഖിശ്രീയെ വീട്ടിലെ ശുചിമുറിക്കുള്ളില് തൂങ്ങിമരിച്ചനിലയില് കണ്ടെത്തിയത്.
യുവാവിന്റെ ശല്യം കാരണമാണ് എസ്എസ്എല്സി പരീക്ഷാഫലം പ്രഖ്യാപിച്ച പിറ്റേദിവസം പെണ്കുട്ടി ആത്മഹത്യ ചെയ്തതെന്ന് പോലീസ് കണ്ടെത്തി. ചിറയിന്കീഴ് പുളിമൂട്ട് കടവ് സ്വദേശിയായ 28 വയസുകാരന് നിരന്തരം ശല്യം ചെയ്തുവെന്നും ഒപ്പം ഇറങ്ങി വന്നില്ലെങ്കില് ജീവിക്കാന് അനുവദിക്കില്ലെന്ന് ഭീഷണിപ്പെടുത്തിയാതായും പെണ്കുട്ടിയുടെ പിതാവ് ആരോപിച്ചിരുന്നു.
