ന്യൂഡല്ഹി : പ്രധാനമന്ത്രിക്കൊപ്പം അയോധ്യക്ഷേത്രത്തിന്റെ ഭൂമിപൂജയില് പങ്കെടുത്ത രാമക്ഷേത്ര ട്രസ്റ്റ് മേധാവി മഹന്ത് നൃത്യ ഗോപാല് ദാസിന് കോവിഡ് ബാധ സ്ഥിരീകരിച്ചു. മഥുരയില് ശ്രീകൃഷ്ണ ജന്മാഷ്ടമി ആഘോഷങ്ങളില് പങ്കെടുത്തതിന് ശേഷം നടന്ന പരിശോധനയിലാണ് കോവിഡ് ബാധ സ്ഥിരീകരിച്ചത്. ഇദ്ദേഹം ഇപ്പോള് മഥുരയിലാണ് ഉള്ളതെന്നാണ് വിവരം. ശ്വാസതടസ്സത്തെ തുടര്ന്ന് നടത്തിയ പരിശോധനയിലാണ് കോവിഡ് സ്ഥിരീകരിച്ചത്.
മഥുര ജില്ലയിലെ മേദാന്ത ആശുപത്രിയിലാണ് ഇദ്ദേഹത്തെ പ്രവേശിപ്പിച്ചിരിക്കുന്നത്. ചികിത്സാ കാര്യങ്ങളുടെ മേല്നോട്ട ചുമതല മഥുര ജില്ലാ കളക്ടര്ക്ക് നല്കിയിട്ടുണ്ട്. മാത്രമല്ല ആഗ്രയില്നിന്നുള്ള ചീഫ് മെഡിക്കല് ഓഫീസറുടെ നേതൃത്വത്തിലുള്ള മെഡിക്കല് സംഘത്തെ ചികിത്സാ സഹായത്തിനായി വിട്ടുകൊടുത്തിട്ടുണ്ട്. ഓഗസ്റ്റ് അഞ്ചിനാണ് അയോധ്യയില് ഭൂമിപൂജ നടന്നത്. അന്ന് വേദിയില് പ്രധാനമന്ത്രിയ്ക്കൊപ്പം മഹന്ത് നൃത്യ ഗോപാല് ദാസും പങ്കെടുത്തിരുന്നു.
മോദിക്കു പുറമെ, ഉത്തര് പ്രദേശ് ഗവര്ണര് ആനന്ദി ബെന് പട്ടേല്, ഉത്തര് പ്രദേശ് മുഖ്യമന്ത്രി യോഗി ആദിത്യനാഥ്, ആര്.എസ്.എസ്. മേധാവി മോഹന് ഭാഗവത് എന്നിവരും ശിലാന്യാസ ചടങ്ങിനു ശേഷം നടത്തിയ സമ്മേളനത്തില് മഹന്ത് നൃത്യ ഗോപാല്ദാസിനൊപ്പം വേദി പങ്കിട്ടിരുന്നു.
