റാന്നി: ഊർജസംരക്ഷണത്തിന്റെയും വൈദ്യുതി സുരക്ഷയുടെയും ബാലപാഠങ്ങൾ കുട്ടികളുമായി പങ്കുവെച്ച് റാന്നി ബി. ആർ.സി. ഇടമുറി ഗവൺമെൻറ് ഹയർസെക്കൻഡറി സ്കൂളിൽ പ്രവർത്തിക്കുന്ന റാന്നി ബിആർസിയുടെ ക്രിയേറ്റീവ് കോർണറിൽ കുട്ടികൾക്ക് എൽഇഡി ബൾബ് നിർമ്മാണത്തിൽ പരിശീലനം നൽകി. ഊർജ്ജ സംരക്ഷണത്തിന്റെയും വൈദ്യുതി സുരക്ഷയുടെയും ബാലപാഠങ്ങൾ പങ്കുവെച്ചുകൊണ്ടാണ് പ്രവർത്തനങ്ങൾ നടത്തിയത്. റാന്നി ബി.പി.സി ഷാജി എ സലാം പരിശീലന പരിപാടി ഉദ്ഘാടനം ചെയ്തു.
ക്രിയേറ്റീവ് കോർണർ സംസ്ഥാന റിസോഴ്സ് ഗ്രൂപ്പ് അംഗമായ ബി.ശില്പ നായർ, സ്കൂൾ കോ-ഓർഡിനേറ്റർ സി.ജി ഉമേഷ്, ക്ലസ്റ്റർ കോ-ഓർഡിനേറ്റർ എസ് ദീപ്തി, അധ്യാപകരായ ടി.വി അർച്ചന, പ്രീതി പ്രഭ എന്നിവർ നേതൃത്വം നൽകി. അഞ്ചു മുതൽ എട്ടു വരെ ക്ലാസിലെ കുട്ടികൾക്കാണ് എൽഇഡി ബൾബ് നിർമ്മാണ പരിശീലനം നൽകിയത്. കുട്ടികൾ സ്വന്തമായി നിർമ്മിച്ച ബൾബുകൾ അവരുടെ വീടുകളിൽ പ്രകാശിക്കും. പരിശീലനത്തിൽ പങ്കെടുത്ത എല്ലാ കുട്ടികളും ബൾബുകൾ നിർമ്മിച്ചു.
