റാന്നി : പഴവങ്ങാടി ഗ്രാമപഞ്ചായത്ത് അതിർത്തിക്കുള്ളിൽ പ്രവർത്തിക്കുന്ന മുഴുവൻ വ്യാപാര – വ്യവസായ സ്ഥാപനങ്ങളെയും നിയമ വിധേയമാക്കുന്നതിനും വ്യാപാരികൾക്ക് ആവശ്യമായ സേവനങ്ങൾ വേഗത്തിൽ ലഭ്യമാക്കുന്നതിനുമായി ജൂൺ 30 വരെ ” വ്യാപാരി മിത്ര “എന്ന പേരിൽ ക്യാമ്പയിൻ നടത്തുന്നു. ഈ ക്യാമ്പയിൻ കാലയളവിൽ വ്യാപാരികൾക്ക് ഇതു വരെ ലൈസൻസ് എടുക്കാതെ പ്രവർത്തിക്കുന്ന സ്ഥാപനങ്ങൾക്ക് പിഴ കൂടാതെ ലൈസൻസ് എടുക്കാം. വ്യാപാര സ്ഥാപനങ്ങളുടെ കരം, തൊഴിൽ നികുതി (പ്രൊഫഷണൽ ടാക്സ് ) എന്നിവ കുടിശ്ശിക കൂടാതെ അടച്ചു തീർക്കാം. ശാസ്ത്രീയമായ മാലിന്യ സംസ്കരണ സംവിധാനങ്ങൾ ഉറപ്പു വരുത്തുക എന്നീ കാര്യങ്ങൾ അടിയന്തിരമായി പൂർത്തീകരിക്കേണ്ടതാണെന്നും റാന്നി പഴവങ്ങാടി ഗ്രാമപഞ്ചായത്ത് അധികൃതര് അറിയിച്ചു.
ഹരിതകർമ്മ സേനയ്ക്ക് യൂസർ ഫീ കൃത്യമായി നൽകി സഹകരിക്കണമെന്നും നിശ്ചിത സമയത്തിനകം ലൈസൻസ് എടുക്കാത്തവർക്കും കരം അടക്കാത്തവർക്കുമെതിരെ ക്യാമ്പയിന് ശേഷം നിയമ നടപടികൾ സ്വീകരിക്കുന്നതായിരിക്കുമെന്നും നാടിന്റെ വികസനത്തിനും സുതാര്യമായ വ്യാപാര അന്തരീക്ഷത്തിനും വേണ്ടി പഴവങ്ങാടി ഗ്രാമപഞ്ചായത്ത് ഒരുക്കുന്ന ഈ ജനകീയ ക്യാമ്പയിനുമായി എല്ലാ വ്യാപാരികളും പൂർണ്ണമായി സഹകരിക്കണമെന്നും പഴവങ്ങാടി ഗ്രാമപഞ്ചായത്ത് പ്രസിഡന്റ് പ്രമോദ് മന്ദമരുതി അഭ്യർത്ഥിച്ചു.
