റാന്നി : റാന്നി താലൂക്ക് ഓഫീസിൽ എത്തിയാൽ മൂക്ക് പൊത്തേണ്ടി വരും. ശുചിമുറിയിൽ സ്ഥാപിച്ചിരിക്കുന്ന മാലിന്യ പൈപ്പിൻ്റെ തകരാർ കാരണമാണ് ശുചിമുറിയിൽ നിന്ന് ദുർഗന്ധം വമിക്കാൻ കാരണമെന്ന് ജീവനക്കാർ പറയുന്നു. റാന്നി സിവിൽ സ്റ്റേഷൻ്റെ രണ്ടാം ബ്ലോക്കിലെ ഒന്നാം നിലയിലാണ് താലൂക്ക് ഓഫീസ് പ്രവർത്തിക്കുന്നത്. റവന്യൂവിഭാഗം ഭൂരേഖാ തഹസിൽദാരുടെ ഓഫീസിലേക്കും മുകളിലത്തെ നിലയിലെ ജി.എസ്.റ്റി.ഓഫീസടക്കം വിവിധ ഓഫീസിലേക്ക് പോകുന്ന പടിയുടെ സമീപത്തായുള്ള പുരുഷൻമാരുടെ ശുചിമുറിയിലാണ് രൂക്ഷമായ തരത്തിൽ ദുർഗന്ധം ഉണ്ടാകുന്നത്.
ഇത് സംബന്ധിച്ച് നിരവധി തവണ പൊതു മരാമത്ത് കെട്ടിടവിഭാഗത്തിൽ താലൂക്കാഫീസിലെ ജീവനക്കാർ പരാതി പറഞ്ഞെങ്കിലും നടപടി ഉണ്ടായില്ലെന്നാണ് പറയുന്നത്. മുകളിലത്തെ നിലയിൽ നിന്നുള്ള മാലിന്യങ്ങൾ വരുന്ന പൈപ്പിന് പൊട്ടൽ ഉണ്ടായതു കൊണ്ടാണ് ഇത്തരത്തിൽ ദുർഗന്ധം ഉണ്ടാകുന്നത്. കഴിഞ്ഞ ഒരു മാസക്കാലമായി താലൂക്കാഫീസിലെ ജീവനക്കാർ മൂക്കുപൊത്തി സഹിച്ചു കഴിയുകയാണ്. വിവിധ ആവിശ്യങ്ങൾക്ക് ഇവിടെ വരുന്ന നാട്ടുകാർക്ക് ദുര്ഗന്ധം സഹിക്കാതായതോടെയാണ് പരാതി ഉയരാൻ കാരണമായത്. ഇത് അടിയന്തിരമായി പരിഹരിക്കണമെന്നാണ് നാട്ടുകാരുടെയും ജീവനക്കാരുടെയും ആവിശ്യം.
