ന്യൂഡല്ഹി : രാജ്യത്തെ സഹകരണമേഖലയെ നിയന്ത്രിക്കാനുറച്ച് ആര്.ബി.ഐ. ഇനി മുതല് സഹകരണ സംഘങ്ങള് ബാങ്ക് എന്ന പദം ഉപയോഗിക്കരുതെന്ന് ആര്.ബി.ഐ ഉത്തരവിട്ടു. പൊതുജനങ്ങള് ഇതിനെതിരെ ജാഗ്രത പുലര്ത്തുകയും വേണമെന്നും കേന്ദ്രബാങ്ക് നിര്ദേശിച്ചു.
1949 ലെ ബാങ്കിങ് റെഗുലേഷന് നിയമത്തിലെ 2020 ലെ ഭേദഗതി പ്രകാരം സഹകരണ സൊസൈറ്റികള്ക്ക് ബാങ്ക്, ബാങ്കര്, ബാങ്കിങ് എന്ന പദങ്ങള് ഉപയോഗിക്കാന് അവകാശമില്ല. ചില സഹകരണ സംഘങ്ങള് ഈ പദങ്ങള് ഉപയോഗിക്കുന്നത് ശ്രദ്ധയില്പ്പെട്ടിട്ടുണ്ടെന്നും അത് ബാങ്കിങ് റെഗുലേഷന് നിയമനത്തിന്റെ ലംഘനമാണെന്നും ആര്.ബി.ഐ വ്യക്തമാക്കുന്നു.
മെംബര്മാരല്ലാത്തവരില് നിന്നും നോമിനല്, അസോസിയേറ്റ് മെംബര്മാരില് നിന്നും നിക്ഷേപം സ്വീകരിക്കുന്നതും നിയമവിരുദ്ധമാണെന്നും ആര്.ബി.ഐ അറിയിച്ചു. സഹകരണ സൊസൈറ്റികളിലെ നിക്ഷേപങ്ങള്ക്ക് ഡെപ്പോസിറ്റ് ഇന്ഷൂറന്സ് ആന്ഡ് ക്രെഡിറ്റ് ഗ്യാരണ്ടി കോര്പ്പറേഷന് നല്കുന്ന ഇന്ഷൂറന്സ് ലഭ്യമാവുകയില്ലെന്നും ആര്.ബി.ഐ പറയുന്നു. ഏതെങ്കിലും സഹകരണ സ്ഥാപനം ബാങ്കെന്ന് അവകാശപ്പെട്ട് രംഗത്തെത്തുകയാണെങ്കില് അവരോട് ആര്.ബി.ഐ നല്കിയ ലൈസന്സ് ആവശ്യപ്പെടണമെന്നും കേന്ദ്രബാങ്ക് പൊതുജനങ്ങളോട് അഭ്യര്ഥിച്ചു.