റാന്നി : തോട്ടമൺകാവ് ദേവീക്ഷേത്രത്തിൽ നടക്കുന്ന അംബായാഗത്തിന്‍റെ രണ്ടാംദിനത്തിൽ വിവിധ ആത്മീയ ചടങ്ങുകളും പ്രഭാഷണങ്ങളും നടന്നു. രാവിലെ 10 ന് ബ്രഹ്മശ്രീ പുല്ലയിൽ ഉണ്ണികൃഷ്ണൻ നമ്പൂതിരി ഭാഗവതപ്രവചനം നടത്തി. 11.30ന് മാതാ അമൃതാനന്ദമയി മഠം മഠാധിപതി സ്വാമിനി ഭവ്യാമൃതപ്രാണയുടെ പ്രഭാഷണവും നടന്നു. ബ്രഹ്മശ്രീ അക്കീരമൺ കാളിദാസ ഭട്ടതിരിയുടെ നേതൃത്വത്തിൽ മഹാഗണപതി ഹവനം നടത്തി. കോട്ടയം നെത്തല്ലൂരിലെ ദേവീമാഹാത്മ്യ സമിതിയുടെ നേതൃത്വത്തിൽ ദേവീമാഹാത്മ്യ പാരായണവും പരിപാടിയുടെ ഭാഗമായി നടന്നു.
വൈകിട്ട് ദേവീഭാഗവത മാഹാത്മ്യ പരിചയണം, ആത്മീയ പ്രഭാഷണങ്ങൾ, ഭക്തിപരിപാടികൾ എന്നിവയും നടന്നു. വെള്ളിയാഴ്ച രാത്രിയിൽ എട്ടിന് ഏലൂർ ബിജുവും 51 ശിഷ്യന്മാരും നയിച്ച സോപാനസംഗീതാമൃതം കലാസന്ധ്യ നടന്നു. ഒക്ടോബർ 18 വരെ നീളുന്ന അംബായാഗത്തിൽ ആത്മീയ ചടങ്ങുകൾക്കൊപ്പം കലാ – സാംസ്കാരിക പരിപാടികളും ഒരുക്കിയിട്ടുണ്ട്. ഭക്തജനങ്ങളുടെയും പൊതുജനങ്ങളുടെയും പങ്കാളിത്തത്തോടെ തോട്ടമൺകാവ് ദേവീക്ഷേത്രം ആത്മീയ – സാംസ്കാരിക സംഗമവേദിയായി മാറുകയാണ്.
