തിരുവനന്തപുരം : ഓണക്കാലത്ത് സബ്സിഡി നിരക്കില്‍ നല്‍കേണ്ട അരി നല്‍കാതെ ജനങ്ങളെ സര്‍ക്കാര്‍ കബളിപ്പിക്കുകയാണെന്നു മുന്‍ പ്രതിപക്ഷ നേതാവ് രമേശ് ചെന്നിത്തല. ബിപിഎല്ലുകാര്‍ക്ക് നല്‍കേണ്ട ഓണക്കിറ്റ് 60 ശതമാനം കടകളിലും കിട്ടാനില്ല. വെള്ളക്കാര്‍ഡുകാര്‍ക്ക് നല്‍കേണ്ട 10 കിലോ അരിയില്‍ രണ്ട് കിലോ മാത്രമാണ് നല്‍കുന്നത്. അതാകട്ടെ അര കിലോ പച്ചരിയും മുക്കാല്‍ കിലോ വീതം വെള്ള, ചന്പാവ് അരി വീതവും.
ഓണത്തിനു എപിഎല്‍ വിഭാഗങ്ങള്‍ക്ക് സബ്സിഡി നിരക്കില്‍ നല്‍കുമെന്ന് സര്‍ക്കാര്‍ പ്രഖ്യാപിച്ച 10 കിലോ സ്പെഷല്‍ അരി 70 ശതമാനം റേഷന്‍ കടകളിലും കിട്ടാനില്ല, സ്റ്റോക്ക് തീര്‍ന്നുവെന്നാണു കട ഉടമകള്‍ പറയുന്നത്. ഓണമായിട്ടു പോലും ഇത്രയും ലാഘവത്തോടെ കാര്യങ്ങള്‍ കൈകാര്യം ചെയ്യുന്ന ഭക്ഷ്യ മന്ത്രി എല്ലാം നന്നായി നടക്കുന്നുവെന്നാണു പത്രസമ്മേളനം നടത്തി ദിവസവും പറയുന്നത്. ഇനിയും കള്ളക്കളി തുടരാതെ ജനങ്ങള്‍ക്ക് അര്‍ഹമായ സാധനങ്ങള്‍ റേഷന്‍ കടകളില്‍ ലഭ്യമാക്കാനുള്ള അടിയന്തര നടപടി സ്വികരിക്കമെന്നു രമേശ് ചെന്നിത്തല ആവശ്യപ്പെട്ടു.
