ഈ മാസം അഞ്ച് പുതിയ ഇന്ത്യൻ നഗരങ്ങളിലേക്കു കൂടി പ്രവർത്തനം വിപുലീകരിക്കാൻ ഇന്ത്യന്‍ ഇലക്ട്രിക് വാഹന സ്റ്റാര്‍ട്ടപ്പ് കമ്പനിയായ റിവോൾട്ട് തയ്യാറെടുക്കുന്നു. കൊൽക്കത്ത, കോയമ്പത്തൂർ, മധുര, വിശാഖപട്ടണം, വിജയവാഡ എന്നിവയുൾപ്പെടെ അഞ്ച് പുതിയ ഇന്ത്യൻ നഗരങ്ങളിൽ തങ്ങളുടെ പ്രവര്‍ത്തന ശ്രേണി വിപുലീകരിക്കാൻ തയ്യാറാണെന്ന് രത്തന്‍ ഇന്ത്യയുടെ കീഴിലുള്ള ഇവി നിർമ്മാതാക്കളായ റിവോൾട്ട് പ്രഖ്യാപിച്ചതായി റിപ്പോര്‍ട്ട് ചെയ്യുന്നു.
നിലവിൽ ദില്ലി, മുംബൈ, പൂനെ, ചെന്നൈ, അഹമ്മദാബാദ്, ഹൈദരാബാദ് എന്നിവിടങ്ങളിലാണ് റിവോൾട്ട് പ്രവർത്തിക്കുന്നത്. 2019 ഓഗസ്റ്റ് മാസത്തിലാണ് ഇന്ത്യന്‍ ഇലക്ട്രിക് വാഹന സ്റ്റാര്‍ട്ടപ്പ് കമ്പനിയായ റിവോള്‍ട്ട് ഇന്‍റലികോര്‍പ്പ് RV 300, RV 400 എന്നീ രണ്ട് മോഡലുകളെ വിപണിയില്‍ അവതരിപ്പിക്കുന്നത്. അടിസ്ഥാന സൗകര്യ മേഖലയിൽ പ്രവർത്തിച്ചിരുന്ന രത്തൻ ഇന്ത്യ ഇൻഫ്ര കഴിഞ്ഞ ഏപ്രിലിലാണ് 150 കോടി രൂപ മുടക്കി റിവോൾട്ട് മോട്ടോഴ്‍സിൽ 43% ഓഹരി പങ്കാളിത്തം സ്വന്തമാക്കിയത്.
മുമ്പ്, ഒക്ടോബറിൽ 3 പുതിയ ഇന്ത്യൻ നഗരങ്ങളിൽ പുതിയ ഡീലർഷിപ്പുകൾ തുറക്കുമെന്ന് കമ്പനി പ്രഖ്യാപിച്ചിരുന്നു. വർദ്ധിച്ചുവരുന്ന പെട്രോൾ വിലയുടെ അനന്തരഫലമായി ഇവികളുടെ ഡിമാൻഡ് വർധിക്കുന്നതായി റിവോൾട്ട് പറഞ്ഞു. കമ്പനിയുടെ മുൻനിര ബൈക്കായ RV 400 വിപണിയില്‍ ശ്രദ്ധേയമായ പ്രകടനമാണ് കാഴ്ചവയ്ക്കുന്നതെന്നാണ് റിപ്പോര്‍ട്ടുകള്‍. സ്വൈപ്പ് എന്നാണ് ഈ സംവിധാനത്തിന്റെ പേര്. ഈ സംവിധാനത്തിലൂടെ ഉടമകൾക്ക് അവരുടെ സ്മാർട്ട്ഫോൺ ആപ്പ് ഉപയോഗിച്ച് റിവോൾട്ട് ഇലക്ട്രിക് മോട്ടോർസൈക്കിൾ റിമോട്ട് വഴി സ്റ്റാർട്ട് ചെയ്യാൻ കഴിയും. പൂര്‍ണ ചാര്‍ജില്‍ 150 കിലോമീറ്ററോളം ഓടാന്‍ കഴിവുള്ള AI പ്രവര്‍ത്തനക്ഷമമാക്കിയ RV 300, RV 400 ബൈക്കുകള്‍ക്ക് 3.24 കിലോവാട്ട്‌സ് ലിഥിയം അയണ്‍ ബാറ്ററിയാണ് ലഭിക്കുന്നത്.
മൈ റിവോൾട്ട് ആപ്പ് വഴിഈ ബൈക്ക് പ്രവർത്തിപ്പിക്കാൻ കഴിയും എന്നതാണ് ഈ ബൈക്കിന്‍റെ ഏറ്റവും വലിയ സവിശേഷത. അത് നിരവധി കണക്റ്റിവിറ്റികൾ, ബൈക്ക് ലൊക്കേറ്റർ/ജിയോ ഫെൻസിംഗ് തുടങ്ങിയ റൈഡ് ഫീച്ചറുകൾ, സ്‌ക്രീനിൽ ഒരു ടാപ്പിലൂടെ ആക്‌സസ് ചെയ്യാൻ കഴിയുന്ന ഇഷ്‌ടാനുസൃത ശബ്‌ദങ്ങൾ എന്നിവ പ്രാപ്‌തമാക്കുന്നു. കൂടാതെ ഇത് പൂർണ്ണമായ ബൈക്ക് ഡയഗ്‌നോസ്റ്റിക്‌സ്, ബാറ്ററി നില, ചരിത്രപരമായ ഡാറ്റ എന്നിവയ്‌ക്കൊപ്പം റിവോൾട്ടിന്റെ ബാറ്ററി സ്വാപ്പ് ചെയ്യുന്നതിന് അടുത്തുള്ള റിവോൾട്ട് സ്വിച്ച് സ്റ്റേഷൻ കണ്ടെത്തുന്നതിനുള്ള ഒരു ഓപ്ഷനും നൽകുന്നു.
റിവോൾട്ടിൽ നിന്നുള്ള ബാറ്ററിയിൽ പ്രവർത്തിക്കുന്ന ബൈക്ക് ഇക്കോ, നോർമൽ, സ്‌പോർട് എന്നീ മൂന്ന് റൈഡിംഗ് മോഡുകളിലാണ് വരുന്നത്. അപ്‌സൈഡ് ഡൗൺ (U S D) ഫോർക്കുകളും പിന്നിൽ പൂർണ്ണമായും ക്രമീകരിക്കാവുന്ന മോണോഷോക്കും RV 400-ലെ മറ്റു ചില പ്രധാന സവിശേഷതകളിൽ ഉൾപ്പെടുന്നു. ഹരിയാനയിലെ മനേസറിലെ ഗ്രീൻഫീൽഡ് പ്ലാൻറിൽ നിന്നാണ് റിവോള്‍ട്ട് ഇലക്ട്രിക്ക് ബൈക്കുകള്‍ പിറക്കുന്നത്.
